വരൂ, ഇനിയൽപ്പം പാരമ്പര്യമാവാം

1. അതിനായി ആദ്യം വീട്ടിലെ മെയിൻ സ്വിച്ചങ്ങ് ഓഫാക്കണം. പഴയ മണ്ണെണ്ണ വിളക്ക് രണ്ടുമൂന്നെണ്ണം സംഘടിപ്പിക്കണം. ഇനിമുതൽ രാത്രി വെളിച്ചത്തിന് അതുമതി. മെഴുകുതിരി നമ്മുടെ പാരമ്പര്യമല്ല കേട്ടോ, വരത്തനാ. ഇനിയൊരു കമുകിന്റെ പാള ടെന്നീസ് റാക്കറ്റിന്റെ ഷേപ്പിൽ കട്ട് ചെയ്തെടുത്താൽ നല്ല ഒന്നാന്തരം വീശാറി ആയി. ഫാനും റെഡി.

2. കാറും ബൈക്കും വല്ല വിദേശികൾക്കും കിട്ടുന്ന വിലക്ക് വിറ്റു തുലക്കണം. അല്ലേൽ ടയറുകുത്തിക്കീറി ആക്രിക്കാരന് കൊടുത്താലും മതി. എന്നിട്ട് സ്വന്തമായി വണ്ടി വേണ്ടവർ ഒരു കാളവണ്ടി ഉണ്ടാക്കിച്ചാ മതി. അല്ലാത്തവർക്ക് നടക്കാം.

3. കൈയിലിരിക്കുന്ന ആ മൊബൈൽ ഫോൺ ഇപ്പൊത്തന്നെ റോഡിലോ തറയിലോ എറിഞ്ഞ് പൊട്ടിച്ചേക്ക്. എടുത്ത് വെള്ളത്തിലിട്ടാലും മതി.

4. ഇന്റർനെറ്റ് എന്ന സംഭവത്തെ പറ്റി ചിന്തിക്കുകയേ ചെയ്യരുത്.

5. കറണ്ടില്ലാത്തതു കൊണ്ടുതന്നെ വീട്ടിലെ ഇലക്ട്രോണിക് ഉപകരണങ്ങൾ എവിടേലും കൊണ്ടോയി ഡംപ് ചെയ്തോളുമല്ലോ.

അയ്യേ, ഇവനിതെന്ത് പ്രാന്താണ് പറയണതെന്ന് ചിലർക്കെങ്കിലും തോന്നിക്കാണും. ഇതൊന്നുമില്ലാത്തൊരു ജീവിതം ഇപ്പോൾ നമുക്ക് സങ്കൽപ്പിക്കാൻ പോലും പറ്റില്ലല്ലേ? കാരണം നമ്മുടെ ജീവിതം അത്രയ്ക്ക് മാറി. ശാസ്ത്രമാണീ പറഞ്ഞ എല്ലാ മാറ്റങ്ങളും കൊണ്ടുവന്നത്. നമ്മുടെ ജീവിതനിലവാരവും ആയുസും ഒപ്പം ഉയർന്നു. ഇന്നത്തെ കാലത്ത്, മണ്ണെണ്ണ വിളക്കിനും കാളവണ്ടിക്കും കുഴിക്കക്കൂസിനും അഞ്ചലോട്ടക്കാരനുമൊക്കെ ചരിത്രപരമായ പ്രാധാന്യത്തിനപ്പുറം ഒന്നുമില്ലായെന്ന് നമുക്കറിയാം. ഇനി, ദാ ഈ പറയുന്ന കാര്യങ്ങൾ കൂടി ഒന്ന് സങ്കൽപ്പിച്ച് നോക്കൂ,

1. നിങ്ങടെ വീട്ടിലാർക്കെങ്കിലും കാൻസറാണെന്ന് തിരിച്ചറിഞ്ഞാൽ, പഴയ കോട്ടൻ മുണ്ടിന്റെ കഷ്ണം ആ മണ്ണെണ്ണ വിളക്കിലേക്ക് കാണിച്ച് കരിച്ചെടുത്ത് വെളിച്ചെണ്ണയിൽ ചാലിച്ച് പുരട്ടണം. കാൻസർ മാറും.

2. ആർത്തവം കൃത്യമല്ലാത്ത സ്ത്രീകൾ കുറച്ച് ചുടുകല്ല് നന്നായി പൊടിച്ച് വെള്ളത്തിൽ കലക്കി കുടിക്കണം. കൃത്യനിഷ്ഠയുടെ പര്യായമാവും പിന്നെ ഓരോ മെൻസസും.

3. വയറുവേദനയ്ക്ക് കുറച്ച് മുരിങ്ങയില അരച്ച് വയറ്റിൽ പുരട്ടി കാത്തിരുന്നാ മതി. വേദന പമ്പ കടക്കും.

4. പാമ്പു കടിച്ചാൽ ഏറ്റവും അടുത്തുള്ള വിഷഹാരിയുടെ അടുത്തേക്ക് എത്രയും വേഗം എത്തിച്ചാ മതി. ശേഷം ചിന്ത്യം.

5. ഹാർട്ട് അറ്റാക്ക് വന്നാൽ മാതളവും കൊളസ്ട്രോളിന് കാന്താരി മുളകും അരച്ചുകഴിച്ചാ മതി.

6. വൈറസ് എന്നു പറയുന്ന സാധനമേയില്ല എന്നങ്ങ് വിശ്വസിക്കണം. പ്രമേഹം, രക്താതിമർദ്ദം ഒക്കെ ആരുടെയൊക്കെയോ സങ്കൽപ്പസൃഷ്ടിയാണെന്നു കൂടിയായാൽ സമ്പൂർണമായി.

ആദ്യം പറഞ്ഞ 5 കാര്യങ്ങൾ സങ്കൽപ്പിക്കാൻ പോലും പാടായിരുന്ന മലയാളികൾക്ക് രണ്ടാമത് പറഞ്ഞ 5 കാര്യങ്ങൾ സ്വജീവിതത്തിൽ സംഭവിക്കുന്നത് എന്തോ പുണ്യപ്രവർത്തി പോലെയാണ്. മോഡേൺ മെഡിസിൻ അഥവാ മരുന്നുമാഫിയക്കാരുടെ കയ്യിൽ പെടാത്തതിലുള്ള ആശ്വാസം വേറെ.

പാരമ്പര്യവൈദ്യമെന്ന അലിഖിതമതത്തിന്റെ വിശ്വാസികളായത് കൊണ്ടാണിങ്ങനെ. ശരിക്കും പാരമ്പര്യവൈദ്യമൊരു മതമാണ്. മേൽപ്പറഞ്ഞ പോലെ കുറേ അന്ധവിശ്വാസങ്ങളാൽ നിർമ്മിതമായ ഒന്ന്. മതമായതുകൊണ്ടു തന്നെ അവിടെ ഉഡായിപ്പ് ദൈവങ്ങളുമുണ്ട്. ദൈവങ്ങളും ശിങ്കിടികളും തങ്ങളെ കൊള്ളയടിക്കുകയാണെന്ന് തിരിച്ചറിയാത്ത വിഡ്ഢി കൂശ്മാണ്ഡങ്ങളാണ് വിശ്വാസികൾ. സ്വന്തം കുഞ്ഞുമരിച്ചാൽ പോലും മതമാണ്, ഉഡായിപ്പാശാനായ ദൈവമാണ് വലുതെന്ന് വാദിക്കുന്ന പടുവിഡ്ഢികൾ. ഫലം ലഭിച്ചില്ലേൽ വിധിയെന്ന് കരുതുന്ന പാവങ്ങൾ. മറ്റു മതങ്ങളേക്കണക്ക് ശാസ്ത്രത്തിന്റെ ഏറ്റവും നൂതനമായ സങ്കേതങ്ങൾ ഉപയോഗിച്ചാണീ മതക്കാരുടെ മതപ്രചാരണവും എന്നതും ശ്രദ്ധേയമാണ്. ചാവേറുകളും സുലഭം.

ഇത്രേയുള്ളു ഇന്നാട്ടിലെ പാരമ്പര്യവൈദ്യം. മറ്റൊരു മതം.

പ്രിയപ്പെട്ട മനുഷ്യന്മാരേ, നിങ്ങൾ മുകളിൽ കണ്ട വൈദ്യുതി, മോട്ടോർ വാഹനങ്ങൾ, മൊബൈൽ ഫോൺ, ഇന്റർനെറ്റ് ഒക്കെ പോലെ, ശാസ്ത്രം നൽകിയ വലിയൊരു സാധ്യതയാണ് മോഡേൺ മെഡിസിൻ. ഈ ഉദാഹരണങ്ങൾ പോലെ തന്നെ അനുദിനം മെച്ചപ്പെട്ടുകൊണ്ടിരിക്കുന്ന, അപ്ഡേറ്റ് ചെയ്യപ്പെട്ടുകൊണ്ടിരിക്കുന്ന മറ്റൊരു സയന്റിഫിക് പ്രോഡക്റ്റ്. കൃത്യമായ രോഗനിർണയോപാധികളും ചികിത്സാ മാർഗങ്ങളും ഏതൊരസുഖത്തിനും അവിടെയുണ്ട്.

പിന്നെ വ്യാജവൈദ്യന്മാരും മറ്റും പറയുന്ന പോലെ, 'മോഡേൺ മെഡിസിൻ കൈയൊഴിഞ്ഞു' എന്നൊരു സംഭവമേ ഇവിടില്ല. പ്രൊപ്പിയോണിക് അസിഡ്യൂറിയ പോലെ പൂർണമായി ചികിത്സിച്ച് മാറ്റാൻ കഴിയാത്ത രോഗങ്ങൾക്കായി ജീവിതശൈലിയിൽ വരുത്തേണ്ട മാറ്റങ്ങളെ പറ്റി കൃത്യമായ മാർഗനിർദ്ദേശങ്ങളുണ്ട്. അത് പാലിക്കണമെന്ന് മാത്രം. ഒരു ചികിത്സയും ചെയ്യാനില്ലാത്ത ഗുരുതരാവസ്ഥയിലുള്ള രോഗികൾക്കു പോലും സ്വസ്ഥമായ മരണം നൽകാനുള്ള 'End of life care' അഥവാ പാലിയേറ്റീവ് കെയർ പോലുള്ള സമ്പ്രദായങ്ങളും അവിടുണ്ട്.

ചേട്ടാ, വീട്ടിൽ കറണ്ട് വരാൻ ലേറ്റായാൽ KSEB ഓഫീസിലേക്കല്ലേ നിങ്ങൾ വിളിച്ചു ചോദിക്കുന്നത്. അല്ലാതെ മീൻകാരനെ അല്ലല്ലോ. അത്രയും കോമൺ സെൻസെങ്കിലും സ്വന്തം ആരോഗ്യകാര്യത്തിൽ കാണിച്ചാൽ കൊള്ളാം.



കലിപ്പ് : മോഡേൺ മെഡിസിനിൽ ഇംപ്രൂവ് ചെയ്യാൻ ഇനിയും പലതുണ്ടാവും. എന്നുവച്ച് ആ ഗ്യാപ്പിൽ പാരമ്പര്യവൈദ്യം കുത്തിക്കേറ്റരുത്. ആ ഗ്യാപ് ശാസ്ത്രം തന്നെ അടച്ചോളും.  😠

©മനോജ്‌ വെള്ളനാട്


രാമുവെന്ന പ്രമേഹക്കാരൻ

അങ്ങനെയിരിക്കെ രാമു ചുമ്മാ നടത്തിയ ആ രക്തപരിശോധനയുടെ റിപ്പോർട്ട് വന്നു. ചുമ്മാ കത്തി വയ്ക്കാൻ കൂടുന്ന ഞങ്ങളുടെ വാട്സാപ്പ് ഗ്രൂപ്പിൽ രാമുവത് ചുമ്മാ ഷെയറും ചെയ്തു. കത്തി വയ്പ്പ് തകൃതിയായി നടക്കുന്നതിനിടയിലാണ് ഞാനത് കാണുന്നത്, RBS -270, HbA1c-7.9. രാമുവിനും എനിക്കും 32 ആണ് പ്രായം. അൽപ്പം അതിശയത്തോടെ ഞാനുടനെ ആ മെസേജിന് റിപ്ളൈ ഇട്ടു,

''ഡയബറ്റിക്!!"

ഗ്രൂപ്പിൽ ആകെ നിശബ്ദത പടർന്നു. കുറച്ചു കഴിഞ്ഞ് രാമു ചോദിച്ചൂ,

''ഇനിയൊരു തിരിച്ചു പോക്ക്...?"

🐾🐾🐾🐾🐾🐾

പ്രിയരേ, ഇത് കഴിഞ്ഞ മൂന്ന് ദിവസങ്ങളിലെ സംഭവമാണ്. എന്റെ പ്രിയ സുഹൃത്ത് രാമു ഇതൊരു പോസ്റ്റാക്കി നിങ്ങളോട് പറയാൻ പറഞ്ഞതിനാൽ എഴുതുന്നതാണ്.

ജീവിതം വലിയ അല്ലലുകളൊന്നുമില്ലാതെ, ഒരു രോഗമോ രോഗലക്ഷണമോ പോലുമില്ലാതെ വളരെ ഈസിയായി പോവുന്നതിനിടയിൽ പെട്ടന്നൊരു ദിവസം താൻ ഡയബറ്റിക്കാണെന്ന് അറിയുമ്പോൾ അക്സപ്റ്റ് ചെയ്യാൻ രാമുവിന് ബുദ്ധിമുട്ടായിരിക്കുമെന്ന് എനിക്കറിയാം. ഞാനുടനെ രാമൂനെ വിളിച്ചൂ. അവൻ ചോദിച്ചൂ,

'ഉറപ്പാണോ?'

'ഈ റാൻഡം ബ്ലഡ് ഷുഗർ 270 ഉം HbA1c 7.9 ഉം കണ്ടാൽ ആള് ഡയബറ്റിക്കാണെന്നാണ് അർത്ഥം. മെഡിസിൻ സ്റ്റാർട്ട് ചെയ്യേണ്ടി വരും'



'അല്ലാതെ പറ്റില്ലാല്ലേ? ഇത് രണ്ടാഴ്ച മുമ്പത്തെ റിപ്പോർട്ടാണ്. ഒരു രണ്ടാഴ്ച ഫുഡും അഡ്ജസ്റ്റ് ചെയ്ത് എക്സർസൈസും ചെയ്താൽ കുറയുമോന്ന് നോക്കിയിട്ട് പോരേ?' (രാമുവിന്റെ ശബ്ദത്തിൽ നേർമ്മ)

'എന്റെ അറിവ് വച്ച് ഇതിപ്പോ ഡയബറ്റിസാണ്. ഏർളി ഡയബറ്റിസോ പ്രി ഡയബറ്റിസോ അല്ല. അങ്ങനായിരുന്നെങ്കിൽ ഡയറ്റും എക്സർസൈസും വച്ച് കുറച്ചുനാൾ നോക്കാമായിരുന്നു. പക്ഷെ ഇവിടെ HbA1c (7.9) വളരെ കൂടുതലാണ്. അതിനർത്ഥം കഴിഞ്ഞ 3-4 മാസമായിട്ട് രാമുവിന്റെ ബ്ലഡ് ഷുഗർ വളരെ കൂടുതലാണെന്നാണ്.'

'ഓ.. പക്ഷെ എനിക്ക് ഒരു ബുദ്ധിമുട്ടും തോന്നിട്ടില്ല.'

'അങ്ങനെ വേണമെന്നില്ല. ഡയബറ്റിസ് പലപ്പോഴും മറ്റസുഖത്തിന് ടെസ്റ്റ് ചെയ്യുമ്പൊഴായിരിക്കും കണ്ടെത്തുന്നത്.'

'ഉം. അപ്പൊ ബുദ്ധിമുട്ടില്ലാത്തപ്പോ മരുന്ന് വേണോ?'

'വേണം. പ്രമേഹത്തിന്റെ ബുദ്ധിമുട്ടുകൾ നമ്മളറിയുന്നത് അത് ഏതെങ്കിലും അവയവങ്ങളെ ബാധിച്ച് തുടങ്ങുമ്പോഴാണ്. രക്തത്തിലെ ഗ്ലൂക്കോസിന്റെ അളവ് കൂടി നിന്നാൽ വൃക്ക, കണ്ണ്, നാഡികൾ, ഹൃദയം, തലച്ചോറ് എല്ലാത്തിനേം പതിയെപ്പതിയെ ബാധിക്കും. അത് ആവുന്ന വിധം തടയുകയാണ് മരുന്നിന്റെ ഉദ്ദേശം'

'ഓ.. ഓക്കേ.. എത്ര നാള് കഴിക്കണം?'

'ഈ പ്രമേഹം ഒരിക്കൽ കണ്ടെത്തിയാൽ, ജീവിതകാലം മുഴുവൻ കൂടെയുള്ള അസുഖമാണ്. അക്കാലമത്രയും മരുന്നും വേണ്ടി വരും'

'ഹൊ! മെനക്കേടാണല്ലേ..'

'ഹേയ്. അങ്ങനെ വിചാരിക്കരുത്. അക്സപ്റ്റ് ചെയ്യാനുള്ള ബുദ്ധിമുട്ട് എനിക്ക് മനസിലാവും. ഇതിപ്പോ നേരത്തേ കണ്ടെത്തിയെന്നത് പോസിറ്റീവായി എടുക്കണം. ഒരു ചെറിയ ടൈംടേബിൾ ജീവിതത്തിലുണ്ടാക്കണമെന്ന് മാത്രം. മരുന്ന്, ഭക്ഷണം, എക്സർസൈസ് ഇവയുടെ കാര്യത്തിലേക്ക്. ടെൻഷനൊന്നും വേണ്ടാ, നമുക്ക് നേരത്തേത് പോലെ, സാധാരണ പോലെ ജീവിക്കാൻ കഴിയും, വിത്ത് മെഡിസിൻ. കൃത്യമായി കഴിക്കണമെന്ന് മാത്രം. കഴിച്ചില്ലെങ്കിൽ ഒരഞ്ച് വർഷത്തിനകം വൃക്കക്കോ കണ്ണിനോ ഒക്കെ കേട് വരാം. പിന്നെ ഡയാലിസിസ് ഒക്കെ വേണ്ടി വരും. മരുന്ന് കഴിച്ചാൽ 5 വർഷത്തിനുള്ളിൽ വരാൻ ചാൻസുള്ള ഈ കോംപ്ലിക്കേഷൻസ് നമുക്ക് ഒരു 20-25 വർഷത്തേക്കെങ്കിലും നീട്ടാം..'



'ഹോ.. എന്തായാലും അതക്സപ്റ്റ് ചെയ്തേ പറ്റു അല്ലെ. ഏത് മരുന്ന് കഴിക്കണം?'

'മരുന്ന് തുടങ്ങും മുമ്പ് ഒരു കാര്യം ചെയ്യൂ. നാളെ രാവിലെ വെറും വയറ്റിലും പിന്നെ ഭക്ഷണശേഷവും ഉള്ള ഷുഗറ് കൂടി നോക്കാം. HbA1c ഒന്നൂടി നോക്കാം. എന്നിട്ടൊരു ഫിസിഷനെ കാണാം. എന്താ?'

🐾🐾🐾🐾🐾🐾🐾

ഇന്നലെ രാവിലെ രാമു വീണ്ടും രക്തം ടെസ്റ്റ് ചെയ്ത്, ഉച്ചയ്ക്ക് റിപ്പോർട്ടയച്ചു. FBS- 138, PPBS-240, HbA1c-11.9!!

ഡയബറ്റിസാണ്. ഡബിൾ കൺഫേംഡ്.

വൈകുന്നേരം രാമുവിനെ വിളിച്ചു. രാമു ആകുലപ്പെട്ടു.

'HbA1c -11.9! അത് പ്രശ്‌നമാണോ?'

'അതിനെ പറ്റി ഓർത്ത് വിഷമിക്കണ്ട. ഡയബറ്റിസ് കൺഫേം ചെയ്യാൻ നോക്കിയതല്ലേ. അപ്പൊ നാളെ വാ, ഫിസിഷനെ കാണാം.'

'നമുക്ക് ഒരു രണ്ടാഴ്ച കൂടി നോക്കീട്ട് കുറഞ്ഞില്ലെങ്കിൽ തുടങ്ങിയാ പോരേ..?'

'ഞാനിന്നലെ പറഞ്ഞതൊന്നും അപ്പൊ തലേ കേറിയില്ലേ..?' (എനിക്ക് ചെറുതായിട്ട് ദേഷ്യം വന്നു)

'അതല്ലാ, ഇവിടെ കുറേപേര് പറഞ്ഞൂ, മരുന്ന് കഴിച്ചു തുടങ്ങിയാപ്പിന്നെ ജീവിതകാലം മുഴുവൻ കഴിക്കേണ്ടി വരും. അതൊക്കെ വേണോ എന്നൊക്കെ ചോദിച്ചപ്പോ..'

'എടാ.. &$@&$&?, π÷&$#@)(, &$#+(@ സ്റ്റുപിഡ് റാസ്കൽ, നിന്നോടിന്നലെ കൃത്യമായി പറഞ്ഞു തന്നതല്ലേ മരുന്നെന്തിനാണ്, എത്ര കാലം കഴിക്കണം, കഴിച്ചില്ലേൽ എന്താണ് കുഴപ്പം എന്നൊക്കെ. പിന്നെ വഴിയെ പോണവര് പറയണത് കേട്ടിട്ടാണോ നീ മരുന്ന് കഴിക്കണോ വേണ്ടേന്ന് തീരുമാനിക്കുന്നത്. സയൻസൊക്കെ പഠിച്ച നീയൊക്കെ ഇങ്ങനെ പറയുന്നത് കേൾക്കുമ്പഴാണ് ചൊറിഞ്ഞ് വരുന്നത്. ബ്ലഡി ഫൂൾ..'

'ഞാൻ നാളെ എത്ര മണിക്ക് വരണം?'

'രാവിലെ വാ.. ഞാനെന്റെ ഫ്രണ്ട് ഫിസീഷനെ വിളിച്ച് പറഞ്ഞേക്കാം.'

'ഓക്കേ. അപ്പൊ രാവിലെ... ബൈ.'

🐾🐾🐾🐾🐾🐾🐾

ഇന്ന് രാവിലെ രാമു ഫിസീഷനെ കണ്ടു. മരുന്നും തുടങ്ങി. ഒരു നേരം കഴിക്കാനുള്ള ഗുളിക മാത്രം. ഭക്ഷണത്തിൽ ചെറിയ നിയന്ത്രണവും എക്സർസൈസും തുടങ്ങാൻ പോകുന്നു. ചിലപ്പോൾ രാമു ഒരു സൈക്കിൾ വാങ്ങും.



👨‍🦱രാമുവിനിന്ന് നിങ്ങളോട് പറയാനുള്ളത്:
             ഞാൻ ഡയബറ്റിക്കാണെന്നറിഞ്ഞത് യാദൃച്ഛികമായി നടത്തിയ രക്ത പരിശോധനയിലൂടെയാണ്. എന്റെ പ്രായത്തിലുള്ള ഒരുപാട് പേർക്കിപ്പോൾ ഇത് കണ്ടെത്തുന്നുണ്ട്. നമ്മുടെ സെഡന്ററി ലൈഫ് സ്റ്റൈൽ, ഭക്ഷണം ഒക്കെ ഇതിന് ഒരു കാരണമാണ്. എക്സർസൈസൊക്കെ പറ്റുന്ന പോലെ ചെയ്യണം. പിന്നെ, നമ്മളെല്ലാം ഒരു ആറ് മാസം കൂടുമ്പോഴെങ്കിലും രക്തം പരിശോധിച്ച് ഈ വക രോഗങ്ങൾ ഇല്ലാന്ന് ഉറപ്പു വരുത്തണം. ഉണ്ടെന്ന് കണ്ടെത്തിയാൽ നാട്ടുകാരുടെയോ വ്യാജന്മാരുടേയോ ഉപദേശം കേൾക്കാൻ നിക്കാതെ ഒരു അംഗീകൃത ഡോക്ടറെ പോയി കാണണം. നമ്മുടെ ആരോഗ്യം, നമ്മുടെ മാത്രം ഉത്തരവാദിത്തമാണ്. അപ്പൊ ഗയ്സ്, എനിക്കിന്നത്തെ മരുന്ന് കഴിക്കാൻ നേരമായി. ബൈ.

രാമുവിന് (പേര് മാറ്റിയിട്ടുണ്ട്) വേണ്ടി,

©മനോജ്‌ വെള്ളനാട്
😎