Wednesday, 16 November 2016

രണ്ടുകുഞ്ഞുകഥകള്‍


(2016 നവംബര്‍ 13-ലെ ജനയുഗം വാരാന്തത്തില്‍ പ്രസിദ്ധീകരിച്ചത്)


1.തെറ്റാലി

ആ തെറ്റാലിയുടെ ഞാണവന്‍ ഇപ്പോളെയ്യുമെന്ന കണക്കെ അവനിലേക്കു തന്നെ വലിച്ചു പിടിച്ചിരുന്നു. പക്ഷെ അതിലെ കല്ലെന്തിനു നേരെ പായിക്കണമെന്നപ്പോഴും നിശ്ചയമുണ്ടായിരുന്നില്ല. നേരെ മുന്നില്‍ അടുത്ത ഫ്ലാറ്റിന്‍റെ ജനല്‍. വലത്തു മറ്റൊന്നിന്‍റെ ബാല്‍ക്കണി. ഇടത്ത് ചുമര്‍. പുറകില്‍ അവന്‍ മാത്രം. ബാല്‍ക്കണിയിലേക്ക് കടന്നുവന്ന കട്ടിമീശക്കാരനെ കണ്ടപ്പോള്‍ കവണയുടെ ഞാണവന്‍ കൂടുതല്‍ വലിച്ചുപിടിച്ചു.
അയാളുമാറി ഫോണില്‍ സംസാരിച്ചുകൊണ്ടൊരു പെണ്‍കുട്ടി വന്നപ്പോള്‍ അതല്‍പം അയഞ്ഞു. പിന്നൊരു തടിച്ച സ്ത്രീയായപ്പോള്‍ വീണ്ടും മുറുകി. ഇടയ്ക്ക് മുന്നിലെ ജനലിനപ്പുറം വെളിച്ചം പരന്നു. വെളിച്ചത്തിനുനേരെയാ കല്ലെയ്തേക്കുമോയെന്നു ഒരുവേള അവന്‍ പോലും ഭയന്നു. അപ്പോഴേക്കും കര്‍ട്ടനുരിഞ്ഞ കാഴ്ചകള്‍ ചില്ലുപൊട്ടിച്ചു കടന്നുവന്നു. അവനാ തെറ്റാലി കൂടുതല്‍ ഭയത്തോടെ, കൂടുതല്‍ ബലത്തോടെ  അവനിലേക്കു തന്നെ വലിച്ചുപിടിച്ചുനിന്നു.





2.ഓട്ടിസം
        
ഓട്ടിസം ബാധിച്ച ഏകമകനെ ഞങ്ങളുടെ കൂടെത്തന്നെയാണ് കിടത്തിയുറക്കിയിരുന്നത്. ഇരുട്ടിനെ പേടിയാണ്. വയസ്സ് പതിനെട്ടായെങ്കിലും ഇപ്പോഴും ഉറക്കത്തില്‍ മുള്ളാറുണ്ട്. മൂത്രം നനഞ്ഞ വസ്ത്രങ്ങളോടെ എന്നെയോ അവളെയോ കെട്ടിപ്പിടിച്ചു ഒന്നുമറിയാത്ത പോലെ കിടന്നുറങ്ങും. എന്നാലും അവന്‍ നമ്മുടെ മോനല്ലേ.
        മൂന്നാലുദിവസം മുമ്പാണ്, ഫേസ്ബുക്കില്‍ ട്രാന്‍സ്ജെന്‍ഡറുകളെയും സ്വവര്‍ഗ്ഗരതിയെയും അനുകൂലിച്ചു ഞാനൊരു കുറിപ്പെഴുതിയദിവസം ഭാര്യയുടെ ഇന്‍ബോക്സിലേക്ക് ഒരു സുഹൃത്ത്  കയറിവന്നുപറഞ്ഞു, 'ഇത് സൂക്ഷിക്കണം കേട്ടോ'. ഞങ്ങള്‍ രണ്ടാളും ഒരേ സ്വരത്തില്‍ ചിരിച്ചു തള്ളുകയും  ഭാര്യ അയാള്‍ക്കെന്തോ മറുപടി നല്‍കി പിണക്കുകയും ചെയ്തു.
        പക്ഷെ ഇന്നലെ അവള്‍ മാര്‍ക്കറ്റില്‍ പോയപ്പോള്‍ പതിവില്ലാതെ മോനെയും കൂടെക്കൊണ്ടുപോകാനൊരുങ്ങി. 'ഞാനിവിടെ ഉണ്ടല്ലോ' എന്ന് പറഞ്ഞപ്പോള്‍ കേട്ടഭാവം കാണിച്ചില്ല.. രാത്രിയില്‍ അവനോടൊപ്പം അവള്‍ പായവിരിച്ചു നിലത്തു
കിടക്കാനൊരുങ്ങിയപ്പോള്‍ ഞാന്‍ ചോദിച്ചു,
           "എന്താ സീതേ ഇതൊക്കെ..?"
അവളൊന്നും മിണ്ടാതെ അവനുറങ്ങും വരെ ചേര്‍ത്തുപിടിച്ചു കിടന്നു. മോനുറങ്ങിയ ശേഷം കട്ടിലിലേക്ക് വന്നെന്‍റെ നെഞ്ചില്‍ തലചായ്ച്ചു കെട്ടിപ്പിടിച്ചുകിടന്നു. എന്നിട്ടിടയ്ക്കെപ്പോഴോ പറഞ്ഞു,
       

               "എനിക്കറിയാം.. എന്നാലും, അവന്‍ നമ്മുടെ മോനല്ലേ.."





തുടർന്ന് വായിക്കുക...

Friday, 11 November 2016

പു.ക.സ. കഥാപുരസ്‌കാരം

പു.ക.സ. കഥാപുരസ്‌കാരം
നവംബര്‍ 5, 2016
തിരുവനന്തപുരം

കഥ- വെന്റിലേറ്റര്‍





തുടർന്ന് വായിക്കുക...

Thursday, 20 October 2016

മനോരാജ് സ്മാരക കഥാപുരസ്‌കാരം 2016


ചേറായി, എറണാകുളം
2016 ഒക്ടോബര്‍ 16

കഥ: അഗ്നിയില്‍ എരിയാത്ത ആയുധങ്ങള്‍







കെ.പി.രാമനുണ്ണിയില്‍ നിന്നും 



അക്ഷരസൗഹൃദങ്ങള്‍- അനീഷ്‌ ശ്രീകുമാര്‍, അജിത്‌ നീലാഞ്ജനം, ഷിനിലാല്‍,ഭ്രാന്തന്‍ അംജത്, മുകേഷ് മുരളി, മനോജ്‌ നിരക്ഷരന്‍, സിയാഫ് അബ്ദുള്‍ഖാദിര്‍, സന്ദീപ്‌ അയ്യാരില്‍ കൃഷ്ണന്‍

അജിത്‌ നീലാഞ്ജനം, മനോജ്‌ വെങ്ങോല, ഷിനിലാല്‍





തുടർന്ന് വായിക്കുക...

Saturday, 17 September 2016

വെസ്റ്റീജിയല്‍ ഓര്‍ഗന്‍സ്- കഥാവായന

 വെസ്റ്റീജിയല്‍ ഓര്‍ഗന്‍സ് എന്ന കഥയ്ക്ക് 2016 ലെ കേളി സാഹിത്യ അവാര്‍ഡ്‌ സമ്മാനിച്ച്‌ കൊണ്ട് ജൂറി നടത്തിയ വിലയിരുത്തല്‍..

കഥ വായിക്കാന്‍- ഇവിടെ ക്ലിക്കാം


വര- ചന്‍സ്


ആത്മപീഡനത്തിന്‍റെ വാള്‍ത്തലപ്പിനു മീതെയുള്ള സഞ്ചാരമാണ് കഥയെഴുത്ത്. സ്വയം അന്യവത്കരിക്കപ്പെടുകയും അനുഭവങ്ങളുടെ ഉഷ്ണസമതലങ്ങളിലൂടെ നടക്കുവാന്‍ വിധിക്കപ്പെടുകയും ചെയ്യുന്നതിന് നിയോഗിക്കപ്പെട്ടതത്രേ ഒരു കഥാകൃത്തിന്‍റെ ആയുസിന്‍റെ ആകെത്തുക.വര്‍ത്തമാനകാലത്തിന്‍റെ സവിശേഷതകളില്‍ നിന്നും ഉരുവം കൊണ്ട്, നിരന്തര വിചാരണയ്ക്ക് വിധേയമാകുന്ന ഏത് സങ്കീര്‍ണ്ണതയില്‍ നിന്നും വഴിതെറ്റി നില്‍ക്കുവാന്‍ കഥയെഴുത്തുകാരന് കഴിയില്ല. കഥാവസ്തുവിനെ കഥാകാരന്‍റെ വൈയക്തികതയുമായി ഇണക്കിച്ചേര്‍ത്തു മാത്രം വായിക്കുന്ന ഉപരിപ്ലവ ഭാവുകത്വങ്ങള്‍ക്ക് മനുഷ്യജീവിതത്തിന്‍റെ പ്രശ്നവത്കരിക്കപെട്ട പുതുപ്രമേയങ്ങളെ ഉള്‍ക്കൊള്ളുവാന്‍ ആകില്ല. ചുട്ടുപഴുത്ത്, നെരിപ്പോടുപോലെ ഉള്ളില്‍ നീറി നില്‍ക്കുന്ന ജീവിതകാമനകളോടുള്ള അടങ്ങാത്ത അനുകൂലാസക്തി തന്നെയാണ് എന്നും കഥാസാഹിത്യത്തിനു കരുത്ത് പകര്‍ന്നിട്ടുള്ളത്. സദാചാരത്തിന്‍റെ വിരുദ്ധമുഖമാണ് ലൈംഗികതയെന്ന ലളിതവ്യാഖ്യാനം സാര്‍വത്രികമാകുന്ന സമകാലീനസാഹചര്യത്തില്‍ മനുഷ്യജീവിതവുമായും ജീവനുമായും ബന്ധപ്പെട്ട ഏത് ചോദനകളും തന്‍റെ കഥാഖ്യാനവൃത്തത്തില്‍ കൊണ്ടുവരാതെ കഥ പറയുന്നയാള്‍ക്ക് സ്വസ്ഥതയുണ്ടാകില്ല.

ഡോ.മനോജ്‌ വെള്ളനാടിന്‍റെ 'വെസ്റ്റീജിയല്‍ ഓര്‍ഗന്‍സ്' എന്ന കഥ മുകളില്‍ പരാമര്‍ശിച്ചിരിക്കുന്ന അവസ്ഥാവിശേഷങ്ങളുമായി ബന്ധിപ്പിച്ചുമാത്രമേ വായിച്ചു തീര്‍ക്കാനാകൂ. ബൌദ്ധികസമൂഹത്തില്‍ ചര്‍ച്ചാവിഷയമായിരിക്കുന്ന സ്വവര്‍ഗാനുരാഗം എന്ന പ്രമേയത്തെ അനന്യസാധാരണമായ കയ്യൊതുക്കത്തോടെ ആവിഷ്ക്കരിച്ചിരിക്കുന്നു എന്നതാണ് ഈ കഥയെ വേറിട്ടു നിര്‍ത്തുന്നത്.

ജീവജാലങ്ങളുടെ ലൌകിക വ്യവഹാരങ്ങളെയും നൈമിത്തികങ്ങളെയും നിര്‍ണ്ണയിക്കുന്നതില്‍ കാമം പോലുള്ള ആന്തരിക ചോദനകള്‍ക്ക് പ്രബലമായ സ്ഥാനമുണ്ട്. ഇത്തരം ഉള്‍ദാഹങ്ങളെ സന്മാര്‍ഗ്ഗസംവിധാനത്തിനകത്ത് കൂച്ചുവിലങ്ങിടുന്ന പ്രവണത, സമൂഹത്തിന്‍റെ നിര്‍ബാധമായ ഒഴുക്കിന് പ്രതിബന്ധമാകുകയും ചെടിപ്പുളവാകുന്ന ജീവിതാവാസവ്യവസ്ഥയെ സൃഷ്ടിക്കുകയും ചെയ്യും. ന്യൂനപക്ഷങ്ങളായ സ്വവര്‍ഗാനുരാഗികളെ സാമൂഹികജീവിതത്തിന്‍റെ വേലിപ്പുറത്തു ഒതുക്കി നിര്‍ത്താന്‍ എന്നും നമ്മള്‍ ദത്തശ്രദ്ധരായിരുന്നല്ലോ. ഒരു കാലത്തും മനുഷ്യജീവിതത്തിന്‍റെ ജൈവികപരിസരങ്ങളില്‍ അവര്‍ക്കിടമുണ്ടായിരുന്നില്ല.

മൊബൈല്‍ ഫോണിനു റേഞ്ച് കിട്ടാത്ത വെള്ളിമല എന്ന നാട്ടിന്‍പുറത്തിന്‍റെ പശ്ചാത്തലത്തിലാണ് ഈ കഥയ്ക്ക് ആധാരമായ ക്രിയാംശങ്ങള്‍ നടക്കുന്നത്. സ്വവര്‍ഗ്ഗത്തില്‍ പെട്ട ഒരാളെ സ്നേഹിച്ചതിന് സമൂഹത്തിന്‍റെ ശിക്ഷയെ ഭയന്നാണ് ഈ കഥയിലെ ജെയിനമ്മ വെള്ളിമലയില്‍ എത്തുന്നത്. ഇടവിളയില്‍ ജാനുവിന്‍റെ പ്രസവത്തിന് സൂതികര്‍മ്മം നടത്തുന്നുണ്ട് ജയിനമ്മ. അതേസമയം തന്നെയാണ് വടക്കേക്കണ്ടത്തില്‍ അസീസ്‌ സുന്നത്തുകര്‍മ്മം കഴിഞ്ഞ വേദനയില്‍ കരയുന്നതും. വെള്ളിമലയില്‍ പുതുതായി ആരംഭിച്ച പ്രാഥമികാരോഗ്യകേന്ദ്രത്തിലേക്ക് ജോലിയ്ക്കായി വന്നെത്തുന്ന ഡോക്ടറും , അവരവിടെ വരുന്നതിനു മുമ്പേ, വെള്ളിമലയിലെ പത്തഞ്ഞൂറു പേരെയെങ്കിലും ഗര്‍ഭപാത്രത്തില്‍ നിന്നും ഭൂമിയിലേക്ക് വലിച്ചുപുറത്തിട്ട ജയിനമ്മയും കണ്ടുമുട്ടുക എന്നത് യാദൃശ്ചികമാകാനിടയില്ല. ഒരിക്കലും പ്രസവിക്കാത്ത ജയിനമ്മയാണ് 'ഗര്‍ഭാശയപ്പൊരുത്തം' എന്ന സിദ്ധാന്തം ആദ്യമായി ആവിഷ്കരിക്കുന്നത്. ഗര്‍ഭാശയപ്പൊരുത്തം ഇല്ലെങ്കില്‍ ഒരാണിനും ഒരു പെണ്ണിനെ ഗര്‍ഭിണിയാക്കാന്‍ കഴിയില്ലെന്നതാണ് അതിന്‍റെ രത്നച്ചുരുക്കം. ഡോക്ടര്‍ വെള്ളിമലയില്‍ എത്തുന്നതിന് മുമ്പ് തന്നെ ജയിനമ്മ പ്രസവമെടുക്കലൊക്കെ നിര്‍ത്തി വാര്‍ദ്ധക്യാവസ്ഥയെ പ്രാപിച്ചു കഴിഞ്ഞിരുന്നു.

ആശുപത്രിയില്‍ പ്രവേശിപ്പിക്കപ്പെട്ട ജയിനമ്മയോട് 'ഗര്‍ഭാശയപ്പൊരുത്തം' ഉള്ളതാണോ എന്ന് ഡോക്ടര്‍ ചോദിക്കുന്നതോടെയാണ് കഥ നിര്‍ണ്ണായകമായ മുഹൂര്‍ത്തത്തിലേക്ക് ആസ്വാദകനെ കൊണ്ടുപോകുന്നത്. "എനിക്കൊരാളെ ഇഷ്മാണ്. പക്ഷെ അതാരും അംഗീകരിക്കുമെന്ന് തോന്നുന്നില്ല" എന്ന് ഡോക്ടറും "അത്രമാത്രം ഇഷ്ടമായിരുന്നു എനിക്കവളെ" എന്ന് ജയിനമ്മയും പറയുന്നിടത്ത് പ്രാണനെ ദ്രവീകരിച്ചുകളയുന്ന രണ്ടുജീവചരിത്രം നാം വായിച്ചെടുക്കുകയാണ്.ഭീതിയിലേക്കും ഏകാന്തതയിലേക്കും ചുരുക്കിയെഴുതപ്പെട്ട രണ്ടു ജീവിതങ്ങളുടെ അവസ്ഥാവിശേഷങ്ങള്‍ എഴുത്തുകാരന്‍റെ മാത്രമല്ല, പൊതുസമൂഹത്തിന്‍റെ ആകുലതയായി മാറുന്നതിന് ഒരുപക്ഷെ ഇനിയും കാലമെടുക്കുമായിരിക്കും. ഇടവിളയില്‍ ജാനുവിന്‍റെ മകള്‍ മായയും വടക്കേക്കണ്ടത്തില്‍ അസീസും തമ്മിലുള്ള പ്രണയപരത കഥയൊടുക്കത്തില്‍ ദുരന്തത്തില്‍ കലാശിക്കുന്നതും, ജയിനമ്മയെയും കൊണ്ട് ഡോക്ടര്‍ വെള്ളിമല വിട്ടിറങ്ങുമ്പോള്‍ മൊബൈല്‍ ഫോണിലേക്ക് കുതിച്ചെത്തുന്ന സന്ദേശങ്ങളും (എല്ലാം ഒരാളുടെത് ആയിരുന്നു) വായിച്ചെടുക്കുവാന്‍ ഒരിക്കലും തളംകെട്ടി നില്ക്കാന്‍ സാധിക്കാത്ത കാലത്തിനു കഴിയും എന്ന ശുഭസൂചനയോടെയാണ് കഥ പരിസമാപ്തിയിലെത്തുന്നത്.

അസാധാരണമായ ഒരു പ്രമേയവും ജീവിതദര്‍ശനവും അതോടൊപ്പം മനുഷ്യശരീരശാസ്ത്രം പഠിച്ചവര്‍ക്ക് മാത്രം സ്വായത്തമായ നിര്‍മ്മമതയോടെ കഥാഖ്യാനം നടത്താനുള്ള ശേഷിയും ഈ കഥയ്ക്ക് അപൂര്‍വമായ ചാരുത നല്‍കുന്നുണ്ട്. തികച്ചും വിഭിന്നമായ ഒരു വിഷയത്തെയും ഇതിവൃത്തത്തെയും സുപരിചിതമെന്ന് തോന്നിക്കുന്ന പശ്ചാത്തലത്തിലേക്ക് പറിച്ചുനട്ടത് കഥയുടെ സ്വഭാവികതയെ നിലനിര്‍ത്തുന്നതിന് അനുഗുണമായിത്തീര്‍ന്നു എന്ന് പറയാം. നാം ഇതഃപര്യന്തം വായിച്ച കഥകളില്‍ നിന്നും വേറിട്ടൊരനുഭവമായിത്തീരുവാന്‍ 'വെസ്റ്റീജിയല്‍ ഓര്‍ഗന്‍സിന്' കഴിയുന്നത് സമകാലിക പ്രസക്തി തന്നെയാണെന്ന് അടിവരയിടുന്നു..






തുടർന്ന് വായിക്കുക...

Saturday, 3 September 2016

പ്രതിരോധം തന്നെ പരിഹാരം (ആരോഗ്യം)

  മാതൃഭൂമി GK & CURRENT AFFAIRS ന്‍റെ ആഗസ്റ്റ്‌ 2016 ലക്കത്തിലെ കവര്‍ സ്റ്റോറിയായി വന്ന ലേഖനം. ചിത്രത്തില്‍ ക്ലിക്ക് ചെയ്താല്‍ വലുതാക്കി വായിക്കാം. നേരിട്ട് ബ്ലോഗില്‍ വായിക്കാന്‍ ഈ ലിങ്ക്- പ്രതിരോധ കുത്തിവയ്പ്പുകള്‍ക്ക് ഒരാമുഖം ക്ലിക്കുക.






 






തുടർന്ന് വായിക്കുക...

Wednesday, 24 August 2016

വിദ്യാധിരാജാ പുരസ്‌കാരം 2016


പ്രസ്‌ ക്ലബ്, തിരുവനന്തപുരം
ഓഗസ്റ്റ്‌ 24, 2016



ബഹു. എം.എല്‍.എ. സി.കെ. ഹരീന്ദ്രനില്‍ നിന്നും..










തുടർന്ന് വായിക്കുക...

Sunday, 22 May 2016

പനിയ്ക്കു പുറകിലെ രസ"തന്ത്ര"ങ്ങൾ (ആരോഗ്യം)



ഒരിക്കലും പനിവരാത്തവര്‍ ഇനി ജനിക്കാനിരിക്കുന്നതേയുള്ളൂ. അത്രയ്ക്കും സാധാരണമായ ഒരു രോഗാവസ്ഥയാണ് പനി. എല്ലാവരും അനുഭവിച്ചിട്ടുള്ളത് കൊണ്ടുതന്നെ പനിയും അതിനോടനുബന്ധിച്ചുണ്ടാകുന്ന അസ്വസ്ഥതകളും ഏവര്‍ക്കും സുപരിചിതവുമാണ്. ഈ ലേഖനം ലളിതമായ ഒരന്വേഷണമാണ്. പനിയോടൊപ്പം സഞ്ചരിച്ച് പനിയുടെ പിറവിയെയും അനുബന്ധസംഭവങ്ങളെയും പറ്റി അറിയാനുള്ള ഒരു ലഘുയാത്ര.

1.നമ്മുടെ ശരീരതാപം സ്വയം നിയന്ത്രിക്കപ്പെടുന്നത് എങ്ങനെയാണ്?

നമ്മളെല്ലാം ഉഷ്ണരക്തജീവികളാണ് (Warm Blooded Animals). ഉഷ്ണരക്തജീവികളുടെ ശരീരത്തിന്‍റെ താപനില അന്തരീക്ഷതാപനിലയേക്കാള്‍ ഉയര്‍ന്നതായിരിക്കും. മാത്രമല്ല ആ താപനില ഒരു നിശ്ചിത പരിധിയ്ക്കുള്ളില്‍ സ്ഥായിയായി തന്നെ നില്‍ക്കുകയും ചെയ്യും. അന്തരീക്ഷതാപനില മാറിയാലും ശരീരതാപനില വലിയതോതില്‍ മാറില്ല. ശരീരത്തിലെ ഉപാപചയ പ്രക്രിയകള്‍ കൃത്യമായി നടക്കാന്‍ ഈ ഉയര്‍ന്നതാപനില അത്യാവശ്യവുമാണ്. മനുഷ്യശരീരത്തിന്‍റെ ശരാശരി താപം 36.8 ഡിഗ്രീ സെല്‍ഷ്യസ് (98.6 ഡിഗ്രീ ഫാരെന്‍ഹീറ്റ്) ആണ്. പകലിലെയും രാത്രിയിലെയും ശരീരതാപനിലകള്‍ തമ്മില്‍ 0.5 ഡിഗ്രീ സെല്‍ഷ്യസിന്‍റെ വ്യത്യാസം എല്ലാവര്‍ക്കും എല്ലാദിവസവും ഉണ്ടാകുന്നുണ്ട്. ശരീരത്തിന്‍റെ പരമാവധി ചൂട് വൈകുന്നേരം നാലിനും രാത്രി എട്ടിനും ഇടയിലായിരിക്കും. ഏറ്റവും കുറവ് അതിരാവിലെ രണ്ടിനും ആറിനും ഇടയിലും. സാധാരണയായി കക്ഷം, വായ (നാക്കിനടിയില്‍), മലാശയം എന്നിവിടങ്ങളില്‍ ഏതെങ്കിലും ഒരിടത്തെ ഊഷ്മാവാണ് നമ്മള്‍ പനിയുമായി വരുന്ന രോഗികളില്‍ അളക്കുന്നത്. ഇവ തമ്മില്‍ തന്നെ 0.3 മുതല്‍ 1 ഡിഗ്രീ സെല്‍ഷ്യസ് വരെ വ്യത്യാസം ഉണ്ട്.

വളരെ സങ്കീര്‍ണ്ണമായ ഒരു പ്രക്രിയയാണ്‌ ശരിക്കും ഈ താപനില ഇങ്ങനെ നിലനിര്‍ത്തുക എന്നത്. തലച്ചോറിലെ ഹൈപോതലാമസ് എന്ന ഭാഗമാണ് എല്ലാവിധ നിയന്ത്രണങ്ങളുടെയും കേന്ദ്രം. അവിടെ, നിലനിര്‍ത്തേണ്ട ശരീരോഷ്മാവ് എത്രയെന്നു ചില പ്രത്യേക ന്യൂറോണുകളില്‍ രേഖപ്പെടുത്തി വച്ചിട്ടുണ്ട്. അതീവ കര്‍ക്കശക്കാരനായ ഒരു നിയമപാലകനെപ്പോലെ ഹൈപോതലാമസ് ഇവിടെ പ്രവര്‍ത്തിക്കും. എന്തെങ്കിലും കാരണങ്ങള്‍ കൊണ്ട് ശരീരോഷ്മാവ് കൂടുകയോ കുറയുകയോ ചെയ്യുമ്പോള്‍ ആ വിവരം നാഡീസന്ദേശങ്ങളായി ഹൈപോതലാമാസില്‍ എത്തുകയും അവിടെ നിന്നും പ്രശ്നപരിഹാരത്തിനുള്ള നിര്‍ദ്ദേശങ്ങള്‍ ശരീരത്തിന്‍റെ വിവിധ ഭാഗങ്ങളിലേക്ക്, പ്രത്യേകിച്ചും പേശികളിലേക്കും അന്തസ്രാവ്യഗ്രന്ഥികളിലേക്കും ചില നാഡീഞരമ്പുകളിലേക്കും പ്രവഹിക്കുകയും ചെയ്യും.

ഇപ്പോള്‍ ശരീരോഷ്മാവ് കൂടുകയാണ് ചെയ്തതെങ്കില്‍ ഹൈപോതലാമസിന്‍റെ നിര്‍ദ്ദേശപ്രകാരം ചൂടുകുറയ്ക്കാനായി ശരീരത്തില്‍ സംഭവിക്കുന്ന മാറ്റങ്ങള്‍ ഇവയാണ്.
  1. ശരീരം വിയര്‍ക്കും (Sweating)- ചൂടുകൂടുമ്പോള്‍ ശരീരത്തിന്‍റെ ആദ്യപ്രതികരണം ഇതാണ്. ഈ വിയര്‍പ്പുതുള്ളികള്‍ ബാഷ്പീകരിക്കാന്‍ ശരീരത്തില്‍ നിന്നും ചൂട് വലിച്ചെടുക്കുകയും അതിലൂടെ ശരീരോഷ്മാവ് കുറയുകയും ചെയ്യും.
  2. രക്തക്കുഴലുകളുടെ വികാസം (Vasodilatation)- തൊലിപ്പുറത്തെ വളരെ ചെറിയ രക്തക്കുഴലുകള്‍ (capillaries) വികസിക്കുകയും അവയിലേക്ക് രക്തമൊഴുക്ക് കൂടുകയും ചെയ്യും. രക്തത്തിലെ ചൂട് റേഡിയേഷന്‍ വഴി പുറംതള്ളാന്‍ ഇതിലൂടെ ശരീരത്തിന് കഴിയും.
  3. ഉപാപചയ പ്രവര്‍ത്തനങ്ങളുടെ തോത് (Rate of Metabolism) കുറയും.
ഇനി അഥവാ ശരീരോഷ്മാവ് താണുപോകുകയാണ് ചെയ്തതെങ്കില്‍ ഹൈപോതലാമസ് ഇടപെട്ട് അത് കൂട്ടാന്‍ നോക്കും. ദാ ഇങ്ങനെ.
  1. വിയര്‍ക്കുന്നത് തടയും
  2. രക്തക്കുഴലുകള്‍ സങ്കോചിക്കും (Vasoconstriction)
  3. താപോല്‍പ്പാദനം (Thermogenesis) വര്‍ദ്ധിക്കും - നമ്മുടെ പേശികള്‍ക്കും തലച്ചോറിനും മറ്റു അവയവങ്ങള്‍ക്കും ഉപാപചയപ്രക്രിയകളിലൂടെ താപം ഉല്‍പ്പാദിപ്പിക്കാന്‍ കഴിയും. പേശികള്‍ക്കാണ് ഇക്കാര്യത്തില്‍ ഏറ്റവും ശേഷിയുള്ളത്‌. കൊഴുപ്പു സൂക്ഷിക്കുന്ന അഡിപ്പോസ് കലകളില്‍ നിന്നും ഇങ്ങനെ താപോല്‍പ്പാദനം നടത്താറുണ്ട്.
  4. ഹോര്‍മോണല്‍ തെര്‍മോജെനസിസ് (Hormonal Thermogenesis)- ശരീരോഷ്മാവ് തീരെ കുറയുമ്പോള്‍ തൈറോയിഡ് ഗ്രന്ഥികള്‍ കൂടുതല്‍ ഹോര്‍മോണുകള്‍ പുറന്തള്ളും. ഈ തൈറോക്സിന്‍ ശാരീരിക പ്രവര്‍ത്തനങ്ങളുടെ വേഗത കൂട്ടുകയും അധികം ചൂട് ഉല്‍പ്പാദിപ്പിക്കുകയും ചെയ്യും.

2. പനി വരുന്നത് എങ്ങനെയാണ്?

പനി വരുന്നത് എന്തുകൊണ്ടാണ് എന്ന് ചോദിച്ചാല്‍ നമുക്കെല്ലാം എന്തെങ്കിലും മറുപടി ഉണ്ടാകും അല്ലേ? ജലദോഷമെന്നോ എലിപ്പനിയെന്നോ ടൈഫോയിഡെന്നോ അല്ലെങ്കില്‍ വൈറല്‍ ഫീവറെന്നോ അങ്ങനെ എന്തെങ്കിലുമൊക്കെ നമ്മള്‍ പറയും. പനി വരാന്‍ ധാരാളം കാരണങ്ങള്‍ ഉണ്ടെന്നും അണുബാധയാണ് അതിലേറ്റവും സാധാരണം എന്നും നമുക്കറിയാം. പക്ഷെ ഒരു അണുബാധ ഉണ്ടാകുമ്പോള്‍ എങ്ങനെയാണ് ഈ പനി വരുന്നതെന്ന് ചോദിച്ചാലോ?!!
അവിടെ, ആദ്യം നമ്മള്‍ മനസിലാക്കേണ്ടത് പനി ഒരു രോഗമല്ലാ, അതൊരു രോഗലക്ഷണം മാത്രമാണ് എന്നതാണ്. ഒരുപാട് രോഗങ്ങളുടെ പല ലക്ഷണങ്ങളില്‍ ഒന്ന് മാത്രം.
ഒരു രോഗാണുവോ മറ്റോ ശരീരത്തില്‍ പ്രവേശിച്ചാലുടന്‍ രക്തത്തിലെ പോലീസുകാരായ ശ്വേതരക്താണുക്കളുടെ നേതൃത്വത്തില്‍ നമ്മുടെ പ്രതിരോധസംവിധാനം അവയെ ആക്രമിക്കും. തുടര്‍ന്ന് ശരീരം ഒരു യുദ്ധഭൂമിയും അവര്‍ യോദ്ധാക്കളുമായി മാറും. യുദ്ധത്തിനുള്ള ആയുധങ്ങള്‍ പക്ഷെ അമ്പും വില്ലുമൊന്നുമല്ല, രാസസംയുക്തങ്ങള്‍ ആയിരിക്കും. ശരിക്കുമൊരു രാസയുദ്ധം (Chemical Warfare). പനിക്ക് കാരണമാകുന്നത് പലപ്പോഴും വൈറസില്‍ നിന്നോ ബാക്റ്റീരിയയില്‍ നിന്നോ നമ്മുടെ ശരീരകോശങ്ങളില്‍ നിന്നോ രക്തത്തില്‍ കലരുന്ന ഇത്തരം രാസവസ്തുക്കളാണ്. പനികാരികളായ ഇത്തരം സംയുക്തങ്ങളെ പൊതുവേ ”പൈറോജനുകള്‍” എന്നാണ് പറയുന്നത്. അവയില്‍ ഏറ്റവും പ്രധാനം IL-1, IL-6, TNF-alpha, INTERFERON എന്നൊക്കെ പറയുന്നവയാണ്. ഈ പൈറോജനുകള്‍ ശരീരത്തില്‍ പ്രോസ്റ്റാഗ്ലാന്‍ഡിന്‍ E2 (PGE2) വിന്‍റെ ഉല്‍പ്പാദനം കൂട്ടും. ഇങ്ങനെ അധികമുണ്ടാകുന്ന PGE2 രക്തത്തിലൂടെ ചെന്ന് ഹൈപോതലാമസിലെ താപനിയന്ത്രണകേന്ദ്രത്തില്‍ സെറ്റ് ചെയ്ത് വച്ചേക്കുന്ന 36.8 ഡിഗ്രീ സെല്‍ഷ്യസ് എന്നത് തിരുത്തി, അല്‍പ്പം കൂടിയ സംഖ്യയാക്കും. ഉദാഹരണത്തിന് അത് 40 ഡിഗ്രീസെല്‍ഷ്യസ് എന്നാക്കിയെന്നിരിക്കട്ടെ. അപ്പോള്‍ തലച്ചോര്‍ നാല്‍പ്പതാണ് ശരിക്കും വേണ്ട ശരീരോഷ്മാവ് എന്നു തെറ്റിദ്ധരിക്കുകയും, മേല്‍ സൂചിപ്പിച്ച വഴികളിലൂടെ ശരീരോഷ്മാവ് കൂട്ടാന്‍ ശ്രമിക്കുകയും ചെയ്യും. അങ്ങനെ ചൂടുകൂടും. അപ്പോള്‍ നമ്മള്‍ പറയും പനിപിടിച്ചുവെന്ന്.

3. പനിയ്ക്കുമ്പോള്‍ ശരീരം ചൂടാകുകയല്ലേ ചെയ്യുന്നത്. പിന്നെന്താ, പനി വരുമ്പോള്‍ നമുക്ക് തണുപ്പും വിറയലുമൊക്കെ തോന്നുന്നത്?

പലരും ചെറിയ പനിയൊക്കെയാണെങ്കില്‍ തനിയെ മാറുമെന്നുകരുതി നോക്കിയിരിക്കും. കുറച്ചുകഴിയുമ്പോ നല്ല കുളിരും വിറയലുമൊക്കെ വരുമ്പോഴാണ്, ഇനി രക്ഷയില്ലാ, ആശുപത്രിയില്‍ പോകാമെന്ന് കരുതുന്നത്. ശരിയാണ്, പനിയ്ക്കുമ്പോള്‍ ശരീരം ചൂടാകുകയാണ് ചെയ്യുന്നത്. പിന്നെങ്ങനെ നമുക്ക് കുളിരുന്നു? പിന്നെന്തിന് നമ്മള്‍ വിറയ്ക്കുന്നു?
ഇതിനുള്ള ഉത്തരവും മുമ്പ് പറഞ്ഞതുതന്നെയാണ്. പൈറോജെനുകള്‍ ഹൈപോതലാമസിലെ കല്‍പ്പിതതാപനില ഉയര്‍ത്തുന്നുവെന്ന് പറഞ്ഞല്ലോ. ആ ഉയര്‍ന്ന താപനിലയുമായി താരതമ്യം ചെയ്യുമ്പോള്‍ നിലവിലുള്ള ശരീരോഷ്മാവ് കുറവാണ്. തലച്ചോര്‍ അതിനെ കുളിരായി അടയാളപ്പെടുത്തും. നമുക്ക് തണുപ്പനുഭവപ്പെടും. ഉടനെ ഹൈപോതലാമസ് ശരീരോഷ്മാവ് ഉയര്‍ത്താനുള്ള വഴികള്‍ തേടും. അതില്‍ ഏറ്റവും ഗുണപ്രദമായരീതി പേശികളെ അതിവേഗം സങ്കോചിപ്പിക്കുകയും വികസിപ്പിക്കുകയും (Contraction and Relaxation) ചെയ്യുക എന്നതാണ്. ഒരു സെക്കന്‍ഡില്‍ തന്നെ നിരവധി പ്രാവശ്യം ഈ സങ്കോചവും വികാസവും നടക്കുമ്പോള്‍ നമുക്കത് വിറയലായി അനുഭവപ്പെടും. എല്ലാം തലച്ചോറിന്‍റെ കളികളാണ്.

4. അങ്ങനെ തലച്ചോറാണ് ചൂട് കൂട്ടുന്നതെങ്കില്‍ പാരസെറ്റമോള്‍ കഴിച്ചുകഴിയുമ്പോള്‍ പനി കുറയുന്നതെങ്ങനെ?

 ഇതിനും ഉത്തരം മുകളില്‍ പറഞ്ഞതുതന്നെ. പക്ഷെ അതിനുമുമ്പ് പാരസെറ്റമോള്‍ അല്ലെങ്കില്‍ അതുപോലുള്ള ആന്‍റിപൈറെറ്റിക് (Antipyretic) മരുന്നുകള്‍ എങ്ങനെയാണു പ്രവര്‍ത്തിക്കുന്നത് എന്നറിയണം. ഇവ മുമ്പ് പറഞ്ഞ പ്രധാന പനികാരിയായ (Pyrogen) PGE2 വിന്‍റെ ഉല്‍പ്പാദനത്തെ തടസ്സപ്പെടുത്തുകയാണ് ചെയ്യുന്നത്. അങ്ങനെ PGE2 വിന്‍റെ രക്തത്തിലെ അളവ് താണുപോകും. അതുകാരണം ഹൈപോതലാമസില്‍ PGE2 മുഖേന ഉയര്‍ത്തി നിര്‍ത്തിയിരിക്കുന്ന ഊഷ്മനില പഴയപടി (അതായത് 36.8°C) ആയി താഴും. അങ്ങനെ ആകുമ്പോള്‍ ശരീരതാപനില ആ അവസ്ഥയിലേക്ക് കുറച്ചുകൊണ്ടുവരാന്‍ വേണ്ടി തലച്ചോര്‍ ആജ്ഞാപിക്കും. ശരീരം വിയര്‍ക്കും. തുടര്‍ന്ന് പനി കുറയുകയും ചെയ്യും. അതുകൊണ്ടാണ്, “ഹോ.. ഒന്ന് വിയര്‍ത്തല്ലോ.. ഇനിയങ്ങു കുറഞ്ഞോളും” എന്ന് പണ്ടുള്ളവര്‍ പറയുന്നത്.

5. പനി വരുമ്പോ ശരീരവേദന വരുന്നതിന്‍റെ കാരണം എന്താണ്?

പനിയെന്നു പറയുന്നത് രാവും പകലുമില്ലാതെ നടക്കുന്ന ഒരു രാസയുദ്ധത്തിന്‍റെ ഫലമാണെന്ന് ആദ്യമേ പറഞ്ഞല്ലോ. ആ യുദ്ധഭൂമിയാണ് ശരീരം. ഒരു യുദ്ധം നടക്കുമ്പോള്‍ യുദ്ധഭൂമിക്കും അതിലെ വസ്തുവകകള്‍ക്കും ആയുധങ്ങളേറ്റും യുദ്ധാവശിഷ്ടങ്ങള്‍ കൊണ്ടും കേടുപാടുകള്‍ സംഭവിക്കും. അതാണ്‌ ഇവിടെയും സംഭവിക്കുന്നത്. PGE2 വും മറ്റു സൈറ്റോകൈനുകളും (Cytokines - IL-1,6, TNF) പേശികളിലും സന്ധികളിലുമൊക്കെ ചെന്ന് പ്രവര്‍ത്തിക്കുന്നതിന്‍റെ പരിണതഫലമാണ് ശരീരവേദനയും സന്ധിവേദനയുമൊക്കെ.

6. അങ്ങനെയാണെങ്കില്‍ എല്ലാ പനിയുടെയും കൂടെ ശരീരവേദനയും വരണ്ടേ? അങ്ങനെ കാണാറില്ലല്ലോ..?

അതും ശരിയാണ്. അറിയാവുന്നതും അറിയപ്പെടാത്തതുമായ പല കാരണങ്ങള്‍ കൊണ്ടും മിക്ക രോഗാണുക്കളും നമ്മുടെ രോഗപ്രതിരോധശേഷിയെ പൂര്‍ണ്ണമായി ഉദ്ദീപിപ്പിക്കാറില്ല. ഓരോ രോഗാണുവും ഓരോ അളവിലായിരിക്കും ഇമ്മ്യൂണിറ്റിയെ ഉത്തേജിപ്പിക്കുന്നത്. അതുതന്നെ ചിലത് വളരെ പതുക്കെയും ചിലത് അതിവേഗത്തിലും ആയിരിക്കും. ഉദാഹരണത്തിന് ജലദോഷം ഉണ്ടാക്കുന്നതും ഡെങ്കിപ്പനി ഉണ്ടാക്കുന്നതും വൈറസുകളാണ്. യോദ്ധാക്കളും ആയുധങ്ങളും ഒക്കെ ഏതാണ്ട് ഒരുപോലെതന്നെ. പക്ഷെ യോദ്ധാക്കളുടെ ശക്തിയും യുദ്ധമുറയും മാത്രം വേറെ. ജലദോഷപ്പനിയിൽ നിസാരനായ ശത്രുവിനെ ശരീരം അധികം ജോലിയില്ലാതെ തന്നെ ചെറുത്തുതോൽപ്പിക്കും.. എന്നാൽ ഡെങ്കു വൈറസ് പോലെ ശക്തന്മാരെ തോൽപ്പിക്കാൻ നമ്മുടെ ഇമ്മ്യൂണിറ്റി കുറച്ചധികം വിയർക്കേണ്ടിവരും.  നമ്മുടെ പ്രതിരോധവ്യവസ്ഥ രോഗാണുവിനോട് പ്രതികരിക്കുന്നതെങ്ങനെ എന്നതനുസരിച്ചിരിക്കും രോഗലക്ഷണങ്ങളുടെ തീവ്രത. ശരീരവേദന, പ്രധാനമായും നടുവേദനയും സന്ധിവേദനകളും വായ കയ്പ്പുമൊക്കെ വൈറല്‍ പനികളിലാണ് ബാക്റ്റീരിയല്‍ പനികളേക്കാള്‍ കൂടുതലായി കാണപ്പെടുന്നത്. വൈറല്‍ അണുബാധ ഉണ്ടാകുമ്പോള്‍ കൂടുതലായി ഉല്‍പ്പാദിപ്പിക്കപ്പെടുന്ന ഇന്റര്‍ഫെറോണിന് (Interferon) ഈ സവിശേഷതയുമായി ബന്ധമുണ്ടോയെന്നും സംശയിക്കപ്പെടുന്നു.
വര- അസ്രൂസ്

7. ഒരു പനി വരുമ്പോള്‍ അത് വൈറല്‍ പനി ആണോ ബാക്റ്റീരിയല്‍ പനി ആണോ എന്ന് പരിശോധനകള്‍ ഇല്ലാതെ അറിയാന്‍ പറ്റുമോ?

വൈറല്‍ പനിയാണ് ബാക്റ്റീരിയല്‍ പനിയേക്കള്‍ സാധാരണം. പലപ്പോഴും ഒരു ബാക്റ്റീരിയല്‍ അണുബാധ ഉണ്ടാകുന്നതിന് മുന്നേ ഒരു വൈറല്‍ പനി വരികയും, അതുകാരണം ശരീരത്തിന്‍റെ പ്രതിരോധശേഷി അല്‍പ്പമൊന്നു കുറയുമ്പോള്‍ അവിടേയ്ക്ക് ബാക്റ്റീരിയ കടന്നുകയറി രോഗമുണ്ടാക്കുകയും ചെയ്യാറുണ്ട്. ജലദോഷത്തില്‍ തുടങ്ങി കടുത്ത തൊണ്ട വേദനയിലേക്കും പനിയിലേക്കും രോഗം കൂടിയ അനുഭവം പലര്‍ക്കും ഉണ്ടാകും. രോഗലക്ഷണങ്ങളിലെ ചില സൂചനകളില്‍ നിന്നും ഒരു പരിധിവരെ ഇവയെ വേര്‍തിരിച്ചറിയാന്‍ സാധിക്കും.
  1. പനിയ്ക്കുന്നതിനു മുമ്പോ പനിയോടൊപ്പമോ ഉള്ള ശരീരവേദന, ആകെയൊരു ക്ഷീണാവസ്ഥ ഒക്കെ വൈറല്‍ പനിയിലാണ് കൂടുതല്‍.
  2. തുടക്കത്തിലേ കടുത്ത പനിയുണ്ടെങ്കില്‍ അത് ബാക്റ്റീരിയല്‍ പനിയാകാനുള്ള സാധ്യതയുണ്ട്.
  3. മൂക്കൊലിപ്പ്, മൂക്കടപ്പ്, തലവേദന, ചെറിയ തൊണ്ടവേദനയൊക്കെ ആണെങ്കില്‍ വൈറല്‍ ആകാനാണ് സാധ്യത, പലപ്പോഴും രണ്ടും ഒരുമിച്ചു കാണാറുണ്ടെങ്കിലും.
  4. പനിയോടൊപ്പം ഏതെങ്കിലും ഒരു ശരീരഭാഗത്ത് മാത്രമാണ് പനിയ്ക്ക് കാരണമായ രോഗാവസ്ഥ (ഉദാ: തൊണ്ടവേദന മാത്രം, മുറിവില്‍ ഉണ്ടാകുന്ന പഴുപ്പ്, മൂത്രമൊഴിക്കുമ്പോള്‍ വേദന/ പുകച്ചില്‍ etc) ഉള്ളതെങ്കില്‍ അത് ബാക്റ്റീരിയല്‍ ആയിരിക്കും.
  5. വിശപ്പില്ലായ്മ, ശരീരത്തില്‍ ചുവന്ന പാടുകള്‍ ഒക്കെ രണ്ടിലും ഉണ്ടാകുമെങ്കിലും വൈറല്‍ രോഗങ്ങളിലാണ് അധികവും
ഇങ്ങനെയൊക്കെ ആണെങ്കിലും ഒരു ഡോക്ടറെ കണ്ടുതന്നെ തീരുമാനം എടുക്കണം. പഴയകാലത്തെ ഉഗ്രപ്രതാപികളായിരുന്ന പല ബാക്റ്റീരിയല്‍ രോഗങ്ങളും ആന്‍റിബയോട്ടിക്കുകള്‍ക്ക് മുന്നില്‍ മുട്ടുമടക്കിയെങ്കിലും അതിലും ഭയങ്കരന്‍മാരായ വൈറസുകള്‍ രംഗപ്രവേശം ചെയ്യുകയും കടുത്ത വെല്ലുവിളി ഉയര്‍ത്തുകയും ചെയ്യുന്നുണ്ട്. കൂടാതെ, വൈറസും ബാക്റ്റീരിയയും മാത്രമല്ല, വേറെയും ധാരാളം കാരണങ്ങളുണ്ടല്ലോ പനി വരാന്‍.

8. ഈ പനി വരുമ്പോള്‍ വല്ലാണ്ട് ദാഹിക്കുന്നു. മൂത്രത്തിന്‍റെ അളവ് കുറയുന്നു. മൂത്രം കടുത്തനിറമാകുന്നു. ഇതൊക്കെ എന്തുകൊണ്ടാണ്?

പനി വരുമ്പോള്‍ താപോല്‍പ്പാദനത്തിനായി ശരീരത്തിലെ ഉപാപചയ പ്രക്രിയകളുടെയെല്ലാം വേഗതയും തോതും വര്‍ദ്ധിക്കും. ഇതിനെല്ലാം ധാരാളം ജലം ആവശ്യമാണ്‌. ഒപ്പം ചൂടുകൂടുമ്പോള്‍ ശരീരത്തില്‍ നിന്നും ബാഷ്പീകരിച്ചു പോകുന്ന ജലത്തിന്‍റെയും അളവുകൂടും. ഇതിന്‍റെയൊക്കെ ഫലം നിര്‍ജ്ജലീകരണം ആണ്. ഇതൊക്കെയാണ് ദാഹത്തിനുകാരണം. ശരീരത്തിലെ വെള്ളത്തിന്‍റെ അളവ് കുറയുന്നുവെന്ന് കാണുമ്പൊള്‍ വൃക്കകള്‍ മൂത്രത്തിന്‍റെ അളവ് കുറയ്ക്കും. സാന്ദ്രത കൂടിയ മൂത്രം കടുത്ത നിറത്തില്‍ കാണപ്പെടുകയും ചെയ്യും. അതുകൊണ്ട് പനിയുടെ സാധ്യത കാണുമ്പൊള്‍ മുതല്‍ തന്നെ ധാരാളം ശുദ്ധജലം കുടിയ്ക്കണം.

9. മഴ നനഞ്ഞാല്‍ പനി വരുന്നത് എന്തുകൊണ്ടാണ്? പേടിച്ചാല്‍ പനി വരുമോ?

മഴ നനയുന്നതും പനിയും തമ്മില്‍ അങ്ങനെ കൃത്യമായ ബന്ധമൊന്നും ഇല്ല. മഴ നനയുന്നവര്‍ക്കെല്ലാം പനി വരുന്നില്ലല്ലോ. പിന്നെ ഒരുപാട്നേരം മഴ നനയുമ്പോള്‍ ശരീരം തണുക്കുകയും അതിനെ പ്രതിരോധിക്കാന്‍ കൂടുതല്‍ ചൂടുല്‍പ്പാദിപ്പിക്കുകയും ചെയ്യും ശരീരം. ചിലരില്‍ മാത്രം അത് പനിപോലെ തോന്നിക്കും. ആ ചൂട് സാധാരണയായി 99 ഡിഗ്രീ ഫാരെന്‍ഹീറ്റിന് (37.4 ഡിഗ്രീ സെല്‍ഷ്യസ്) മുകളില്‍ പോകാറില്ല. പലപ്പോഴും ഒന്നോ രണ്ടോ ദിവസം കൊണ്ട് മാറുകയും ചെയ്യും. അതില്‍ കൂടുതല്‍ നില്‍ക്കുന്നുണ്ടെങ്കില്‍ അല്ലെങ്കില്‍ കടുത്ത പനിയുണ്ടെങ്കില്‍ എന്തോ അണുബാധ ഉണ്ടായിട്ടുണ്ട് എന്നുവേണം കരുതാന്‍. ഒരു ഡോക്ടറെ കാണുക.
പുതുമഴ നനയരുതെന്നു പണ്ടുള്ളവര്‍ പറയാറുണ്ട്. അന്തരീക്ഷത്തിലെ പൊടിപടലങ്ങളില്‍ ധാരാളം അണുക്കള്‍ ഉണ്ടാകും. അതൊക്കെ മഴവെള്ളത്തിലൂടെ ശരീരത്തില്‍ എത്തിപ്പെടാന്‍ സാധ്യതയുള്ളതിനാല്‍ ആകണം അങ്ങനെ പറയുന്നത്. മറ്റൊന്ന്, മഴക്കാലത്ത് ശരീരോഷ്മാവ് താഴുന്നത് കാരണം വൈറല്‍ രോഗങ്ങള്‍ കൂടുതലായി പിടിപെടാന്‍ സാധ്യതയുണ്ട്. പ്രതിവിധി പക്ഷെ മഴ നനയാതിരിക്കുകയല്ലാ, പഴങ്ങളും ഇലക്കറികളും പച്ചക്കറികളുമൊക്കെ കഴിച്ചു രോഗപ്രതിരോധശേഷി വര്‍ദ്ധിപ്പിക്കുകയാണ്.
പേടി കാരണവും പനി ഉണ്ടാകുമെന്ന് പറയാന്‍ കഴിയില്ല. പേടി കാരണം ഉണ്ടാകുന്ന ഉത്കൺഠ ഒരുപാട് ശാരീരിക മാറ്റങ്ങള്‍ക്ക് കാരണമാകുന്നുണ്ട്. ഉറക്കമില്ലായ്മയും വിശപ്പില്ലായ്മയും ഒക്കെ അതിന്‍റെ ഭാഗമാണ്. അതുപോലെ ശരീരത്തിന്‍റെ ചൂടും കൂടും. പക്ഷെ കൃത്യമായി പനിയെ പേടിയുമായി ബന്ധപ്പെടുത്താന്‍ ബുദ്ധിമുട്ടാണ്.

10. ചിലരുടെ ശരീരം എപ്പോഴും പനിയുള്ളതുപോലെ ചൂടായിരിക്കുമല്ലോ. അതെന്തുകൊണ്ടാണ്?

ചിലരുടെ ശരീരം അങ്ങനെയാണ്. എപ്പോഴും ചൂട്. അങ്ങനെ ഉള്ളവരുടെ ശരീരത്തില്‍ കൊഴുപ്പ് ശേഖരിക്കപ്പെടുന്നത് പ്രധാനമായും ബ്രൌണ്‍ ഫാറ്റായിട്ടായിരിക്കും. ഈ വക കൊഴുപ്പുകോശങ്ങളില്‍ (Adipose Cells) മൈറ്റോകൊണ്ട്രിയ എന്ന കോശാവയവം എണ്ണത്തില്‍ വളരെയധികം കാണും. അതുകാരണം അവര്‍ എപ്പോഴും ഉപാപചയപ്രക്രിയയില്‍ ഏര്‍പ്പെട്ടുകൊണ്ടിരിക്കും (Metabolically Active). അതുവഴി കൂടുതല്‍ ചൂട് ഉല്‍പ്പാദിപ്പിക്കപ്പെടും. നവജാതശിശുക്കളിലും ഇതേ ബ്രൌണ്‍ ഫാറ്റാണുള്ളത്. അതുകൊണ്ടാണ് കുഞ്ഞുങ്ങളുടെ ശരീരം ചൂടായിത്തന്നെ ഇരിക്കുന്നത്.
മറ്റുള്ളവരില്‍ അത് മൈറ്റോകോണ്ട്രിയ കുറഞ്ഞ വൈറ്റ് ഫാറ്റ് ആയിരിക്കും.

11. അപ്പൊ, എല്ലാ ചൂടും പനിയല്ലാ, ല്ലേ..?

അല്ലാ.. പനിയല്ലാതെ ശരീരം അമിതമായി ചൂടാകുന്ന അവസ്ഥയ്ക്ക് ഹൈപ്പര്‍തെര്‍മ്മിയ (Hyperthermia) എന്നാണ് പറയുന്നത്. ഹൈപ്പര്‍തെര്‍മിയയില്‍ ഹൈപോതലാമസിലെ കല്‍പ്പിത ഊഷ്മനിലയ്ക്ക് വ്യതിയാനമൊന്നും വരുന്നില്ല. പൈറോജനുകളുടെ ഇടപെടല്‍ ഒന്നും തന്നെ ഉണ്ടാകുന്നില്ല. പക്ഷെ ചൂട് കൂടും. കാരണങ്ങള്‍ പലതാണ്. ഒരുപാട് നേരം ചൂടുള്ള അന്തരീക്ഷത്തില്‍ ജോലി ചെയ്യുക, തൈറോയിഡ് ഹോര്‍മോണിന്‍റെ അളവ് കൂടുക, സൈക്കോസിസിനും മറ്റും കഴിക്കുന്ന ചില മരുന്നുകളുടെ പ്രതിപ്രവര്‍ത്തനം മൂലം, മയക്കുമരുന്നുപയോഗം , അപസ്മാരം, തലച്ചോറിലെ രക്തസ്രാവം അങ്ങനെ നിരവധി കാരണങ്ങള്‍. ഇപ്പൊ നമ്മുടെ നാട്ടില്‍ സാധാരണമായ സൂര്യാഘാതം ഈ ഹൈപ്പര്‍തെര്‍മിയയ്ക്ക് ഉദാഹരണമാണ്‌.
എല്ലാ പനിയും നിസാരമല്ലെന്ന് നമുക്കറിയാം. എന്നാലും മിക്ക പനികളും താനേ മാറുന്നവയുമാണ്. പക്ഷെ, നിസാരമായ ഒരു പനി വരണമെങ്കില്‍ തന്നെ ഏതെല്ലാം അവയവങ്ങള്‍, എന്തുമാത്രം കഷ്ടപ്പെടുന്നുണ്ടെന്നു ഇപ്പൊ മനസിലായില്ലേ. ഒരിക്കല്‍ കൂടി ഓര്‍മ്മിപ്പിക്കുന്നു, പനി ഒരു രോഗമല്ലാ, രോഗലക്ഷണം മാത്രമാണ്. പനിയുണ്ടാകുന്നത്, ചൂടുകൂട്ടി രോഗാണുക്കളെ തുരത്താനുള്ള ശരീരത്തിന്‍റെ ശ്രമമാണെന്നൊക്കെ ശാസ്ത്രലോകം സംശയിച്ചിരുന്നെങ്കിലും അങ്ങനെയൊന്നുമല്ലാ എന്ന് തെളിവുകള്‍ സൂചിപ്പിക്കുന്നു. മാത്രമല്ല PGE2 അധികമുണ്ടാകുന്നത് നമ്മുടെ ഇമ്മ്യൂണിറ്റിയെ തളര്‍ത്തുമെന്നും പഠനങ്ങള്‍ തെളിയിക്കുന്നു. പല പ്രകൃതിചികിത്സകരും വ്യാജന്മാരും പനിയ്ക്ക് ചികിത്സ വേണ്ടാ, പനി വരുന്നത് നല്ലതാണ്, ചികിത്സിക്കുന്നത് ദോഷമാണെന്നൊക്കെ വാദിക്കുന്നുണ്ട്. അതൊക്കെ വ്യാജപ്രചാരണങ്ങള്‍ മാത്രം. ഡോക്ടറെ കാണുകയും ചികിത്സ വേണ്ടതാണെങ്കില്‍ ചികിത്സിക്കുകയും തന്നെ ചെയ്യണം.
ലേഖനത്തിന്‍റെ വലിപ്പം കൂടുന്നതിനാല്‍ പനിയെപ്പറ്റി ഏറ്റവും സാധാരണമായ ചില കാര്യങ്ങള്‍ മാത്രമാണ് ചര്‍ച്ച ചെയ്തത്. പനിവിശേഷങ്ങള്‍ ഇനിയും ധാരാളമുണ്ട്. ഇത്രയൊക്കെ പറഞ്ഞുതന്ന സ്ഥിതിയ്ക്ക് ഒരു ചോദ്യം അങ്ങോട്ടു ചോദിക്കാം. ശരാശരി അന്തരീക്ഷ താപനില 25-30 ഡിഗ്രീസെല്‍ഷ്യസ് ആണല്ലോ. നമ്മുടെ ശരീരോഷ്മാവ് 37 ഡിഗ്രീസെല്‍ഷ്യസും. ശരിക്കും നമുക്കത് തണുപ്പായനുഭവപ്പെടേണ്ടതാണ്. അതുണ്ടാകുന്നില്ല. എന്ന് മാത്രമല്ല, അന്തരീക്ഷതാപം ശരാശരിക്കു മുകളില്‍ പോയാലോ, നമുക്ക് കടുത്ത ചൂടനുഭവപ്പെട്ടു തുടങ്ങുകയും ചെയ്യും. എന്തുകൊണ്ടാണ് ഇങ്ങനെയൊക്കെ? എല്ലാവരും ഉത്തരം കണ്ടുപിടിച്ചിട്ട് അടുത്ത ക്ലാസില്‍ വന്നാ മതി.  (ക്ലൂ- ഈ ചോദ്യം ബയോളജിയല്ലാ, ഫിസിക്സ് ആണ്)
(ചിത്രങ്ങള്‍- ഗൂഗിള്‍)






തുടർന്ന് വായിക്കുക...

Friday, 13 May 2016

കടപയാദി (കുറിപ്പുകള്‍)


കേരളത്തില്‍ വ്യാപകമായി ഉപയോഗിച്ചിരുന്നതും , ആര്യഭടീയത്തില്‍ പ്രയോഗിച്ചിരിക്കുന്നതും, ഒരുപക്ഷെ കേരളത്തില്‍ തന്നെ ജന്മമെടുത്തതുമായ ഒരു അക്ഷരസംഖ്യാ സമ്പ്രദായമാണ് "പരല്‍പ്പേര്" അഥവാ 'കടപയാദി'. സംഖ്യകളെ സൂചിപ്പിക്കാന്‍ വാക്കുകള്‍ ഉപയോഗിക്കുകയാണ് ഇതില്‍ ചെയ്യുന്നത്. തിരിച്ചും ആകാം. നമ്മുടെ മലയാളം അക്ഷരങ്ങള്‍ ഓരോന്നിനും പൂജ്യം മുതല്‍ ഒമ്പതുവരെയുള്ള ഒരു സംഖ്യാവില കല്‍പ്പിച്ചുനല്‍കി, അതിനനുസരിച്ച് വാക്കുകള്‍ക്ക് വിലയിടുന്ന ഏര്‍പ്പാടാണ് ഈ കടപയാദി. എങ്ങനെയാണെന്നറിയാന്‍ ചിത്രം നോക്കൂ..


എല്ലാ സ്വരാക്ഷരങ്ങള്‍ക്കും പൂജ്യം എന്ന് വിലയിടുക..
വ്യഞ്ജനങ്ങളില്‍ 'ക' മുതല്‍ 'ങ' വരെയുള്ള അഞ്ചക്ഷരങ്ങളും 'ച' മുതല്‍ 'ഞ' വരെയുള്ള അഞ്ചക്ഷരങ്ങളും ചേര്‍ത്ത് ഒന്ന് മുതല്‍ പൂജ്യം വരെ വിലയിടുക. ഇതുപോലെ 'ട' വര്‍ഗ്ഗത്തിനും 'ത'വര്‍ഗ്ഗത്തിനും വില നല്‍കുക. 'പ' വര്‍ഗത്തിന് ഒന്ന് മുതല്‍ അഞ്ചു വരെ വില നല്‍കിയശേഷം 'യ' മുതല്‍ 'ഴ' വരെയുള്ള പത്ത് അക്ഷരങ്ങള്‍ക്കും ക്രമപ്രകാരം വിലയിടുക.'റ' യ്ക്ക് പൂജ്യം എന്നും നല്‍കുക. ഇതാണ് 'കടപയാദി'യിലെ അക്ഷരങ്ങളും അവയുടെ മൂല്യം പേറുന്ന സംഖ്യകളും തമ്മിലുള്ള ബന്ധം.
ഈ സമ്പ്രദായപ്രകാരം വാക്കുകള്‍ക്ക് വിലനല്‍കുന്നതിന് ഒരു വാക്കിലെ ഓരോ അക്ഷരങ്ങളുടെയും വില ചേര്‍ത്തെഴുതി തിരിച്ചിട്ടാല്‍ മതി. കണ്‍ഫ്യൂഷന്‍ ആയാ. ദാ ദിങ്ങനെ.
'ഹരി' എന്ന വാക്കിന്‍റെ വില കാണണം. നമ്മുടെ പട്ടിക അനുസരിച്ച് 'ഹ'യുടെ വില 8 ആണ്. 'ര'യുടെ വില രണ്ടും. ചേര്‍ത്തെഴുതിയാല്‍ 82. തിരിച്ചിട്ടാല്‍ 28. അപ്പൊ ഹരിയുടെ വില 28.

'ശാരദ'യോട് 'കൊല്ലം' കൂട്ടിയാല്‍ ക്രിസ്തുവര്‍ഷം !!! 

എന്ന് കേട്ടിട്ടുണ്ടോ. കടപയാദിയെ സംബന്ധിക്കുന്ന ഒരു പ്രയോഗമാണത്. നമ്മുടെ പട്ടികപ്രകാരം 'ശാരദ'യുടെ വില നോക്കിയാല്‍ {ശ=5, ര=2, ദ=8} 825 എന്ന് കിട്ടും. കൊല്ലം എന്ന് പറഞ്ഞത് കൊല്ലവര്‍ഷമാണ്. അതായത് ഇപ്പോള്‍ കൊല്ലവര്‍ഷം 1191 അല്ലെ. അപ്പോള്‍ ശാരദയോട് കൊല്ലം കൂട്ടിയാല്‍ , 825+1191= 2016, ക്രിസ്തുവര്‍ഷം. ഇതൊക്കെ കണ്ടെത്തിയവനെ സമ്മതിക്കണം. കൂട്ടത്തില്‍ എന്നേം.

"എന്‍റെ കൂടെ വരുന്നതൊക്കെ കൊള്ളാം, പക്ഷെ 'കമാ'ന്നൊരക്ഷരം മിണ്ടരുത്"
നമ്മളൊക്കെ ഇടയ്ക്കെങ്ങിലും പറയുന്ന ഒരു ഡയലോഗാണിത്, അതെന്താണെന്ന് അറിയില്ലെങ്കിലും. ‘കമ’ എന്നത് ഒരക്ഷരം അല്ല എന്ന് നമുക്കറിയാം. അപ്പോള്‍ എങ്ങനെയാണു ഈ പ്രയോഗം ഉണ്ടായത്? കടപയാദി പട്ടിക അനുസരിച്ച്, ‘ക’ യുടെ വില 1, മ=5, അപ്പോള്‍ ‘കമ' എന്ന് പറഞ്ഞാല്‍ 51. മലയാളത്തിലെ 51 അക്ഷരങ്ങളില്‍ ഒന്നുപോലും ഉരിയാടരുത് എന്നാണതിന്‍റെ അര്‍ത്ഥം. എന്താല്ലേ..

അമ്പത്തൊന്നക്ഷരാളി

ഇത്രയും പഠിച്ചു കഴിഞ്ഞ നമ്മള്‍ വിചാരിക്കും, അപ്പോ ഈ അമ്പത്തൊന്നക്ഷരാളി എന്ന് പറയുന്നത് 51 മലയാള അക്ഷരങ്ങളെയെല്ലാം കൂടി ചേര്‍ത്തു പറയുന്നതായിരിക്കുമെന്ന്. അതുചിലപ്പോ കടപയാദിയെ പറ്റി കേട്ടിട്ടില്ലെങ്കിലും നമ്മള്‍ അങ്ങനെ ചിന്തിച്ചിട്ടുണ്ടാകണം. എന്നാല്‍ സത്യം അതല്ലാ. ഈ അമ്പത്തൊന്നക്ഷരാളി പ്രയോഗവും കടപയാദി സമ്പ്രദായത്തിലേതാണ്. “ഹരിശ്രീ ഗണപതയേ നമ:” എന്ന മന്ത്രത്തിന്‍റെ സംഖ്യാരൂപമാണ് 51. അതെങ്ങനെ 51 ആകുന്നു എന്നറിയാന്‍ ചിത്രം നോക്കൂ.




(റഫറന്‍സ്- വാമൊഴി ചരിത്രം, വെള്ളനാട് രാമചന്ദ്രന്‍)

കൂടുതല്‍ അറിയാന്‍ ആഗ്രഹമുള്ളവര്‍ക്ക് ഈ വിക്കിപീഡിയ പേജ് സന്ദര്‍ശിക്കാം.




തുടർന്ന് വായിക്കുക...

Tuesday, 10 May 2016

തര്‍പ്പണം (കഥ)


(2016 may 8 ലെ ജനയുഗം വാരാന്തത്തില്‍ പ്രസിദ്ധീകരിച്ചത്)


“ഇവിടിരിക്കാം..”

അവസാനത്തേതില്‍ രണ്ടാമത്തെ പടവിലെത്തി നിന്നുകൊണ്ട് കര്‍മ്മി പറഞ്ഞു. അയാള്‍ തന്‍റെ സ്ഥൂലശരീരം പാടുപെട്ടുവളച്ചു വാഴയിലയും കിണ്ടിയും ആ പടവില്‍ വച്ചു.

“ഒന്ന് മുങ്ങി വരൂ..”

ജീവന്‍റെ കുഞ്ഞോളങ്ങള്‍ പോലുമില്ലാതെ കിടക്കുന്ന പുഴയുടെ വരട്ടുചൊറി ബാധിച്ച തൊലിപ്പുറത്തേക്ക് ചൂണ്ടിക്കൊണ്ടയാള്‍ പറഞ്ഞു. കര്‍ണ്ണന്‍ ആ ജീർണിച്ച കാഴ്ചകളിലേക്ക് നോക്കി മടിച്ചു നിന്നു..

“എന്നാ അല്‍പം കൈക്കുമ്പിളില്‍ കോരി നെറുകയില്‍ തളിച്ചു വരൂ.. പുണ്യജലം, പുണ്യജലം തന്നെ”

കര്‍ണ്ണന്‍ ഉടുപ്പഴിച്ചു ജൂലിയെ ഏല്‍പ്പിച്ചു അവസാനപടവിലിറങ്ങി നിന്നു. അവള്‍ ഏഴാമത്തെ പടവിലിരുന്നു മൊബൈല്‍ ക്യാമറയില്‍ ഒക്കെയും പകര്‍ത്തി തുടങ്ങി.

“അച്ഛനല്ലേ..?”

“അതെ" ജൂലിയാണ് മറുപടി പറഞ്ഞത്.

“ദുര്‍മരണം വല്ലതും?”  കര്‍ണ്ണന്‍ വലത്തേക്ക് തലചരിച്ചു  ഒരു കാക്കയെപ്പോലെ ജൂലിയെ നോക്കി. ജൂലി ക്യാമറ സൂം ഇന്‍ ചെയ്തു കര്‍ണ്ണന്‍റെ  ആ മുഖഭാവം കൃത്യമായി പകര്‍ത്തി.  

“ഡീ.. ബ്രൈറ്റ്നെസ്സ് മാക്സിമത്തിലിട്ടു എടുക്ക്. അല്ലെങ്കില്‍ ഇരുണ്ടുപോകും..” പറഞ്ഞുകൊണ്ട് കര്‍ണ്ണന്‍ കര്‍മ്മിയുടെ നേരെ തിരിഞ്ഞിരുന്നു.

“അതായത്, ആത്മഹത്യ, കൊലപാതകം, വിഷം തീണ്ടല്‍, വാഹനാപകടം അങ്ങനെ ഏതെങ്കിലും ആയിരുന്നോ? അങ്ങനെയെങ്കില്‍ വേറെ ചില കര്‍മ്മങ്ങള്‍ കൂടി ചെയ്യേണ്ടതുണ്ട്.” കര്‍മ്മി അരിയും എള്ളും ചേര്‍ത്തുവേവിച്ച ചോറ് വഴയിലയിലേക്ക് പകരുന്നതിനിടയില്‍ പറഞ്ഞു.

“ഇത്രേള്ളോ, ദുര്‍മരണങ്ങളുടെ പട്ടിക?”

ഇരുവരും ഒരുമിച്ചത് ചോദിച്ചപ്പോള്‍ കര്‍മ്മിയാകെ പകച്ചു. അയാളുടെ വിളര്‍ച്ച ജൂലി പ്രത്യേകം ഫോക്കസ് ചെയ്തു.

പവിത്രം..
കര്‍ണ്ണന്‍ പവിത്രം വാങ്ങി ധരിച്ചു.
പരേതന്‍റെ പേര്?
ആദിത്യന്‍
നാള്?
തിരുവാതിര
ഏറ്റു ചൊല്ലൂ.. ഗംഗേ ച
ഗംഗേ ച
യമുനേ ചൈവ
യമുനേ ചൈവ
ഗോദാവരി സരസ്വതി
ഗോദാവരി സരസ്വതി
ജൂലി വീഡിയോയില്‍ സംഭാഷണങ്ങള്‍ കൃത്യമായി കിട്ടാനായി നാലാമത്തെ പടവിലേക്കിറങ്ങി വന്നു. കര്‍മ്മിയുടെ ചെവിയുടെ ഔട്ട്‌ ഓഫ് ഫോകസ് ഷാഡോയോടൊപ്പം കര്‍ണ്ണനെ വ്യക്തമായി കാണുന്ന ഫ്രെയിം അവള്‍ കൂടുതല്‍ ഇഷ്ടത്തോടെ പകര്‍ത്തി.  

“മാതാവിന്‍റെയും പിതാവിന്‍റെയും ഭാഗത്തുനിന്നും മണ്മറഞ്ഞുപോയ സകല പൂര്‍വികരെയും മനസ്സില്‍ ധ്യാനിച്ചുകൊണ്ട് ആദ്യപിണ്ഡം വച്ചോളൂ.”

“ഇത് പങ്കുവയ്ക്കാനുള്ളതല്ല..” മറുപടി പെട്ടന്നായിരുന്നു. കര്‍ണ്ണന്‍ തന്‍റെ സ്വതസിദ്ധമായ സൗമ്യസ്വരത്തില്‍ തന്നെയാണത് പറഞ്ഞത്. പക്ഷെ കര്‍മ്മി കൂടുതല്‍ വിളര്‍ത്തു.

“ശരിക്കും നിങ്ങള്‍ ബലിയിടാന്‍ തന്നെ വന്നതാണോ? ഇതൊന്നും കുട്ടിക്കളിയല്ലാ, സത്യോള്ള കാര്യങ്ങളാണ്. ഷോര്‍ട്ട്ഫിലിം  പിടിത്തമാണെങ്കില്‍ എന്നെ ദയവായി ഒഴിവാക്കൂ.”

കര്‍മ്മി  കര്‍ണ്ണനെയും ജൂലിയും മാറിമാറി നോക്കി പറഞ്ഞുകൊണ്ടിരുന്നു.

“സ്വാമി പേടിക്കേണ്ടാ.. ശരിക്കും ബലിയാണ്. ഷൂട്ട്‌ ചെയ്യുന്നത് ഒരാള്‍ക്ക് അയച്ചു കൊടുക്കാന്‍ വേണ്ടിയാണ്. ദയവായി കര്‍മ്മങ്ങള്‍ തുടരൂ..”

കര്‍ണ്ണന്‍റെ ശബ്ദത്തിലെ സൗമ്യതയും മുഖത്തെ ശാന്തതയും കര്‍മ്മിയെ കൂടുതലെന്തെങ്കിലും  ചോദിക്കുന്നതില്‍ നിന്നും വിലക്കി.

മൂന്നിലകളിലായി സമര്‍പ്പിച്ച ബലിച്ചോറ് ഒറ്റയിലയിലേക്ക് പകര്‍ന്ന്, തലയില്‍ വച്ച് കര്‍ണ്ണന്‍ ആദ്യപടവിലേക്ക് ഇറങ്ങി.

“പുറംതിരിഞ്ഞു നിന്ന് പുറകിലേക്ക്, വെള്ളത്തിലേക്ക് ഇട്ടോളൂ..” കര്‍മ്മി തന്‍റെ ചിലമ്പിച്ച ശബ്ദത്തില്‍ നിര്‍ദേശങ്ങള്‍ നല്‍കിക്കൊണ്ടിരുന്നു.

ദക്ഷിണവാങ്ങിയ നോട്ട് ഇരുകണ്ണുകളിലും മുട്ടിച്ചു നമസ്കരിക്കുന്ന കര്‍മ്മിയുടെ  മുഖത്തുനിന്നും സൂം ഔട്ട്‌ ചെയ്തുകൊണ്ട് ജൂലി, ക്യാമറ പിണ്ഡം വീണുണ്ടായ ഓളങ്ങളിലേക്ക് ഫോക്കസ് ചെയ്തു. ഓളങ്ങള്‍ കരയടുക്കാതെ പാതിവഴിയില്‍ ഒടുങ്ങുന്നു.

“ഷാള്‍ ഐ സ്റ്റോപ്പ്‌?” അവള്‍ ചോദിച്ചു.

“യെസ്.”

“യു വാണ്ട്‌ ടു സീ? ഒന്ന് കണ്ടുനോക്ക്‌..” അവള്‍ മൊബൈല്‍ കര്‍ണ്ണന് നേരെ നീട്ടി.

“വേണ്ടാ.. അയാള്‍ക്ക് വാട്ട്സാപ് ചെയ്തേക്ക്. ഇരുന്ന് കാണട്ടെ.” കര്‍ണ്ണന്‍ ഷര്‍ട്ട് എടുത്തണിഞ്ഞു വേഗത്തില്‍ പടവുകള്‍ കയറി.

“ആര്‍ക്കാണ്?” അയാളെ പിന്തുടര്‍ന്ന കര്‍മ്മിയുടെ പതിഞ്ഞ ഒച്ചയില്‍ ആകാംക്ഷയുടെ അതിപ്രസരമായിരുന്നു.

കര്‍ണ്ണന്‍ ഒരു നിമിഷം നിന്നു. കര്‍മ്മിയും. ഇരുവരും മുഖത്തോടുമുഖം നോക്കി അല്‍പ്പനേരം നിശബ്ദരായി തന്നെ നിന്നു.

“ചില കര്‍മ്മങ്ങള്‍ ജീവിച്ചിരിക്കുമ്പോള്‍ തന്നെ ചെയ്യണം സ്വാമി. മരണം വന്ന് രക്ഷപ്പെടുത്തിയതിന് ശേഷം നമുക്ക് കുറ്റബോധം തോന്നരുതല്ലോ.”

അതുപറയുമ്പോഴും കര്‍ണ്ണന്‍റെ മുഖത്തുണ്ടായിരുന്ന ആ ദൃഡമായ ശാന്തത കണ്ട് കര്‍മ്മിക്ക് ശരിക്കും ഭയം തോന്നി. കര്‍ണ്ണനും ജൂലിയും കയറിയ  കാര്‍ അകന്നുപോകുന്നതും നോക്കി കര്‍മ്മി തിരിയുമ്പോള്‍, ബലിപ്പടവില്‍ ചിതറിക്കിടന്ന വറ്റുകള്‍ക്ക് മീതെ ചെറുതായി ചെറുതായി വരുന്ന ഒരു കാക്കയുടെ നിഴല്‍ അയാള്‍ക്ക് കാണാമായിരുന്നു.

ജനയുഗം-മെയ്‌ 8, 2016







തുടർന്ന് വായിക്കുക...